«Կողմնակալ է և չի արտացոլում իրականությունը»․ Ադրբեջանի ԱԳՆ արձագանքը՝ Լաչինի միջանցքը անհապաղ բացելու վերաբերյալ ԵԽ մարդու իրավունքների հանձնակատարի հայտարարությանը

Ադրբեջանի ԱԳ նախարարությունն իրեն բնորոշ հիստերիկ ու նյարդային կերպով է արձագանքել Լաչինի միջանցքն անհապաղ բացելու՝ Եվրոպայի Խորհրդի մարդու իրավունքների հանձնակատար Դունյա Միյատովիչի հայտարարությանը։

Մասնավորապես, Ադրբեջանի ԱԳՆ-ն Միյատովիչի հայտարարությունը որակել է ոչ օբյեկտիվ և տարածաշրջանում խաղաղությանը չնպաստող։

«Եվրախորհրդի մարդու իրավունքների հանձնակատար Դունյա Միյատովիչի հայտարարությունը Լաչինի ճանապարհի շուրջ ստեղծված իրավիճակի վերաբերյալ կողմնակալ է և չի արտացոլում տեղում առկա իրողությունները: Հանձնակատարը, կարծես, ևս մեկ անգամ կիրառում է երկակի ստանդարտներ և ընտրովի մոտեցում»,- ասվում է հայտարարության մեջ։

Գերատեսչությունը նշում է, որ «դժվար է հասկանալ Միյատովիչի կողմնակալ դիրքորոշումը Լաչինի ճանապարհին խաղաղ ցույցերի նկատմամբ, որոնք պահանջում են կանխել Ադրբեջանի բնական պաշարների անօրինական շահագործումը»։ Բաքուն նաև շարունակում է պնդել, թե Արցախում, իբր, հումանիտար աղետ չկա։

«Հանձնակատարի հայտարարությունը չի նպաստում տարածաշրջանում խաղաղությանը: Եվս մեկ անգամ կոչ ենք անում հանձնակատարին՝ լինել անաչառ, ինչպես պահանջում է իր մանդատը, և զերծ մնալ գործողություններից և հայտարարություններից, որոնք կարող են արատավորել Եվրոպայի Խորհրդի հեղինակությունը»,- ասվում է հայտարարության մեջ։

Հավելենք, որ ավելի վաղ Բաքուն նույն կերպ արձագանքել էր տարբեր երկրների, որոնք Լաչինի միջանցքը բացելու վերաբերյալ հայտարարություններով էին հանդես եկել։

Էմմա Չոբանյան