Արկտիկական փոթորիկն ԱՄՆ-ում Սուրբ Ծննդյան տոների շեմին քաոս է ստեղծել

ԱՄՆ որոշ շրջաններում փոթորիկը, որի նմանը գրանցվում է կես դարը մեկ անգամ, կտրուկ սառնամանիքներ է գրանցել՝ մինչև -40C և սուրբծննդյան ուղևորությունների շեմին քաոսի պատճառ դարձել։ Հազարավոր ավիաչվերթներ հետաձգվել են, իսկ երկրի մի շարք հիմնական ավտոմայրուղիներ փակված են մնացել, գրում է VOA-ն։

Ուժեղ ձյունն ու փոթորկոտ քամին խափանել են միլիոնավոր ամերիկացիների հանգստյան ծրագրերն այն բանից հետո, երբ երկիրը հսկայական արկտիկական ճակատի է բախվել։ Միլիոնավոր մարդիկ ստացել են ձմեռային փոթորկի մասին ծանուցումներ կամ նախազգուշացումներ, իսկ երկրի որոշ հատվածներում այնպիսի ցուրտ է, որ մի քանի րոպե դրսում գտնվելը կարող է հանգեցնել ցրտահարության:

Ամերիկյան ավտոմոբիլային ասոցիացիայի տվյալներով՝ շատ շրջաններում ձյուն է տեղացել, ճանապարհներին վտանգավոր պայմաններ են ստեղծվել։

Հիմնական հյուսիսային I-90 ավտոմայրուղին փակվել է Հարավային Դակոտայում, իսկ նահանգի իշխանություններն արդեն զգուշացրել են, որ այն չի վերաբացվի մինչև ուրբաթ:

Ավելի քան 22,000 չվերթ հետաձգվել է, որից 5,500-ն ամբողջությամբ չեղարկվել է՝ ըստ Flightaware.com-ի: Չիկագոյի և Դենվերի խոշոր օդանավակայաններում չեղարկվել են բազմաթիվ չվերթներ։

Ակնկալվում է, որ այս տարի ամերիկյան արձակուրդային ճանապարհորդությունները կմոտենան մինչհամաճարակային մակարդակին, ընդ որում՝ սպասվում է, որ ամենածանրաբեռնված օրը կլինի դեկտեմբերի 23-ը:

Տաթև Ֆռանգյան