16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Իրանը ցանկանում է ընդլայնել ՌԴ-ին զենքի մատակարարումները. «Մոսադ»-ի ղեկավար
Քաղաքականություն
23.12.2022 | 16:39
Իրանը ձգտում է ընդլայնել Ռուսաստանին առաջադեմ սպառազինության մատակարարումը։ DW-ի փոխանցմամբ՝ այս մասին զգուշացրել է Իսրայելի «Մոսադ» հետախուզական ծառայության տնօրեն Դեյվիդ Բարնեան։
«Մենք զգուշացնում ենք Իրանի ապագա մտադրությունների մասին, որոնք նրանք (Իրանի իշխանությունները) փորձում են գաղտնի պահել՝ խորացնել և մեծացնել Ռուսաստանին առաջադեմ սպառազինության մատակարարումը, ընդլայնել ուրանի հարստացման նախագիծը և ակտիվացնել հարձակումները տարածաշրջանում Իսրայելին բարեկամական մահմեդական երկրների վրա»,- ասել է Բարնեան։
«Մոսադ»-ի ղեկավարի գնահատականը հնչել է այն բանից հետո, երբ դեկտեմբերի սկզբին Միացյալ Նահանգները մտահոգություն հայտնեց Թեհրանի և Մոսկվայի միջև «լայնամասշտաբ պաշտպանական գործընկերության» հնարավորության վերաբերյալ:
Նոյեմբերին Թեհրանը խոստովանեց, որ անօդաչու թռչող սարքեր (ԱԹՍ) է ուղարկում Ռուսաստան, բայց, միաժամանակ, հայտարարեց, որ դրանք մատակարարվել են մինչև Ուկրաինա ռուսական ներխուժումը։
ՄԱԿ-ում ԱՄՆ մշտական ներկայացուցիչ Լինդա Թոմաս-Գրինֆիլդի դեկտեմբերի 22-ի հայտարարության մեջ ասվում է, որ Ռուսաստանը՝ ՄԱԿ-ի Անվտանգության խորհրդի մշտական անդամը, օգտագործում է Իրանից և Հյուսիսային Կորեայից գնված զենքը՝ խախտելով ՄԱԿ-ի ԱԽ բանաձևերը։
Տաթև Ֆռանգյան
