Պարտադիր է՝ դասընթացները լինեն ՀՀ-ում, բայց մասնագետներ կարող են գալ այստեղ․ Անդրանիկ Քոչարյան․ ՏԵՍԱՆՅՈՒԹ

ԱԺ պաշտպանության և անվտանգության հարցերի մշտական հանձնաժողովի` դեկտեմբեր 22-ի արտահերթ նիստում երկրորդ ընթերցմամբ քննարկվում է Կառավարության հեղինակած «Արտաքին հետախուզական գործունեության և արտաքին հետախուզության ծառայության մասին» և կից ներկայացված օրենքների նախագծերի փաթեթը:
Ներկայացված օրենքների նախագծերի փաթեթով առաջարկվում է ստեղծել Արտաքին հետախուզության ծառայություն` որպես ՀՀ վարչապետին ենթակա պետական կառավարման համակարգի մարմին: Նպատակ կա առանձին ծառայությունով ՀՀ-ում ձևավորել հետախուզական համայնք, որտեղ կարևորագույն դերակատարություն է վերապահվում արտաքին հետախուզական ծառայությանը:

Օրենսդրական նախաձեռնությամբ հստակեցվել են ծառայության լիազորությունները, համակարգը և կառուցվածքը, ծառայողների իրավունքներն ու պարտականությունները և պատասխանատվությունը, իրավական և սոցիալական երաշխիքները և ծառայության հետ կապված այլ երաշխիքները:

ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի դիտարկմամբ՝ կառույցն առանձնանալով ձեռք կբերի ոչ միայն ինքնուրույն կայանալու հնարավորություն, այլ նաև կնվազեցնի իր գործունեությունը խաթարող անուղղակի խոչընդոտները:

«Սա կարևորագույն որոշում է․ այս կառույցն ունենալու քաղաքական որոշումը գուցե շատ տարիներ առաջ պետք է կայացված լիներ, բայց դրա անհրաժեշտության գիտակցումը պետք է լիներ, եթե հիա է ստեղծվում, ուրեմն հիմա է պահը։ Եթե որևէ մեկը չի հասկանում սրա կարևորությունը և սա դիտում է որպես իշխանությունը պահելու գործիք, չարաչար սխալվում է․ սա պետություն պահելու գործիք է, պետությունը ռիսկերից հեռու պահելու և ռիսկերը կառավարելու գործիք է և նպաստելու է երկրի շահի սպասարկմանը»,- նշեց Քոչարյանը։

Կարևորելով կադրերի պատրաստման ճիշտ ընթացակարգեր ունենալը՝ Քոչարյանն ընդգծեց․ «Պարտադիր է, որ դասընթացները կազմակերպվեն ՀՀ-ում, բայց պարտադիր չէ, որ դասավանդեն միայն հայաստանյան մասնագետները, դրսից մասնագետներ կարող են գալ այստեղ և իրենց հմտությունները փոխանցել այն կադրերին, որոնք համալրելու են այս կառույցը»։

Մանրամասները՝ տեսանյութում։