Փարիզը կարող է պատժամիջոցներ կիրառել Թուրքիայի և Իրանի դեմ․ Ֆրանսիայի ԱԳ նախարար

Ֆրանսիան կարող է, անհրաժեշտության դեպքում, պատժամիջոցներ կիրառել Իրանի և Թուրքիայի նկատմամբ՝ Իրաքի և Քուրդիստանի տարածքի վրա կրկնակի հարձակումների համար։ Այս մասին քրդական Rudaw-ին ասել է Ֆրանսիայի ԱԳ նախարար Կատրին Կոլոննան։

Նշենք, որ Ամմանը հյուրընկալել է Համագործակցության և գործընկերության երկրորդ համաժողովը, որին մասնակցել են տարածաշրջանային և միջազգային առաջնորդներ ու ներկայացուցիչներ՝ քննարկելու մերձավորարևելյան տարածաշրջանի, հատկապես՝ Իրաքի անվտանգության վերջին զարգացումները:

«Մենք խոսում ենք յուրաքանչյուրի հետ։ Իմ գործընկեր Ֆուադ Հուսեյնը գիտի, որ մենք իսկապես մտահոգված ենք, և մենք խոսում ենք այդ գործողությունների պատասխանատուների հետ: Եվ հետո, եթե անհրաժեշտ լինի, մենք կարող ենք պատժամիջոցներ կիրառել։ Դա արդեն արել ենք անցյալում»,- ասել է Կատրին Կոլոննան՝ նշելով, որ խոսքը Իրաքի և Քուրդիստանի շրջանների վրա Իրանի և Թուրքիայի կողմից վերջերս հաճախակի դարձած հարձակումների մասին է:

Հավելենք, որ Թուրքիան նոյեմբերի 20-ին նոր ռազմաօդային գործողություն է սկսել՝ թիրախավորելով Սիրիայի հյուսիսում և Քուրդիստանի տարածքում Ժողովրդական պաշտպանության ջոկատներին (YPG) և Քուրդիստանի աշխատավորական կուսակցությանը (PKK)։

Իրանն էլ վերջին մի քանի ամիսների ընթացքում բազմիցս հարվածներ է հասցրել Քուրդիստանի տարածքում գտնվող ընդդիմադիր կուսակցությունների բազաներին՝ կուսակցություններին մեղադրելով երկրում ընթացող ցույցերի մասնակիցներին զինելու մեջ։

Էմմա Չոբանյան