29.10.2026 | 21:43
Թուրքիայի Կապադովկիա շրջանում երկու մարդ է զոհվել, ևս մեկը՝ վիրավորվել ժայռաբեկորների փլուզման հետևանքով․ ՏԵՍԱՆՅՈՒԹ
Դմիտրի Ռոգոզինը Դոնեցկում վիրավորում է ստացել
Քաղաքականություն
22.12.2022 | 13:12
«Ռոսկոսմոս» պետական կորպորացիայի նախկին ղեկավար Դմիտրի Ռոգոզինը վիրավորվել է Դոնեցկի հյուրանոցներից մեկի գնդակոծման ժամանակ։ Նա հոսպիտալացվել է, կյանքին վտանգ չի սպառնում։ Այս մասին հայտնում են ռուսական պետական ՏԱՍՍ և ՌԻԱ Նովոստի գործակալությունները՝ Ռոգոզինի օգնականին հղումով, փոխանցում է Meduza-ն։
«Դոնեցկի ծայրամասում հրետակոծվել է հյուրանոց, որտեղ վերջին օրերին բնակվում էր ռազմական խորհրդականների խումբը՝ Դմիտրի Ռոգոզինի գլխավորությամբ։ Դմիտրի Ռոգոզինը վիրավորվել է մեջքից։ Նա հոսպիտալացվել, կյանքի համար վտանգ չկա»,- ասել է օգնականը։
Նրա խոսքով՝ վիրավորվել են նաև Ռոգոզինի ուղեկիցները։
«Վիրավոր եմ մեջքից։ Կապրեմ։ Բեկորը ողնաշարից մեկ սանտիմետր է անցել»,- իր հերթին տեղեկացրել է Ռոգոզինը։
Baza-ն հայտնում է, որ հրետակոծության է ենթարկվել Դոնեցկի ռեստորանը, որտեղ Ռոգոզինը նշել է իր ծննդյան տարեդարձը։
Ըստ որոշ տեղեկությունների՝ հրետակոծության հետևանքով կարող էր վիրավորվել հինգ մարդ և առնվազն մեկը կարող էր զոհվել՝ ինքնահռչակ Դոնեցկի կառավարության նախագահ Վիտալի Խոցենկոյի թիկնապահը։ Ինքը՝ Խոցենկոն վիրավորվել է, ՏԱՍՍ-ին ասել է նրա մամուլի քարտուղարը։
Էմմա Չոբանյան
