Լիտվացի զինվորները լքում են Բելառուսի հետ սահմանը

Լիտվացի զինվորականները դադարեցրել են Բելառուսի հետ սահմանի մշտական պաշտպանությունը, սակայն ստեղծվել են արագ արձագանքման խմբեր՝ անհրաժեշտության դեպքում պետական սահմանային ծառայությանն աջակցելու համար։ Այս որոշումն ընդունվել է արգելապատնեշի շինարարական աշխատանքների վերջին փուլի և անվտանգության համակարգերի տեղադրման հետ կապված։ Ծրագիրն ամբողջությամբ պետք է իրականացվի մինչև տարեվերջ, հաղորդում է Euronews-ը։

Լիտվայի սահմանային ծառայությունը պնդում է, որ սահմանը հատելու փորձերը չեն դադարում։ Օրերս լիտվական կողմը տեսանյութ էր հրապարակել, որում բելառուս սահմանապահներն օգնում են անօրինական ներգաղթյալներին մուտք գործել Լիտվա։

«Այս տարի մենք գրանցել ենք ցանկապատի վնասման շուրջ 350 դեպք: Վերջերս մենք նկատեցինք, որ դա տեղի է ունենում հենց այնտեղ, որտեղ այժմ չկան տեսահսկման համակարգեր: Երբեմն մեր սպաների արձագանքման ժամանակն է ստուգվում, միայն մի քանի դեպքում է պատնեշը վնասվել այնտեղ, որտեղ տեսախցիկներ կան»,- ասել է Պետական սահմանային ծառայության պետի տեղակալ Ռիմանտաս Պետրաուսկասը։

Լիտվայի ազգային գվարդիան անցած ամառ միգրացիոն ճգնաժամի բռնկման պահից ի վեր օգնում է սահմանապահներին Բելառուսի հետ սահմանի պարեկության հարցում։ Օգոստոսից ավելի քան 19,000 միգրանտների թույլ չեն տվել Լիտվա մտնել։

Ընդհանուր առմամբ, վերջին մեկ տարում Բելառուսից ապօրինի Լիտվա է ժամանել ավելի քան 4,000 մարդ։ Կառավարությունը միգրանտների հոսքն անվանում է բելառուսական ռեժիմի հիբրիդային հարձակում։

Տաթև Ֆռանգյան