Կարծում եմ` կա հավանականություն, որ Լաչինի միջանցքը կբացվի, հաշվի առնելով ՄԱԿ֊ում ելույթները. Եղոյան․ ՏԵՍԱՆՅՈՒԹ

Արդյո՞ք Լաչինի միջանցքը կբացվի մինչև տարեվերջ։ ԱԺ-ում լրագրողների հետ զրույցում անդրադառնալով այս հարցին՝ ԱԺ «Քաղաքացիական պայմանագիր» խմբակցության պատգամավոր Արման Եղոյանը նշեց, որ չի ցանկանում կանխատեսում անել, սակայն դրա հավանականությունը կա։

«Այս պահին դրա հավանականությունը կա, բայց կա նաև չբացվելու հավանականություն: Երկու դեպքում կարող է բացվել միջանցքը. կա՛մ երբ փակողների պահանջները իրականացվեն, կա՛մ երբ փակողները տեսնեն, որ իրենց պահանջներն իրականացնել չի ստացվում և այլևս անհնար է պահանջել դրանց իրականացում: Մենք երկրորդ տարբերակող պետք է առաջ շարժվենք, որովհետև առաջին տարբերակով մենք շարժվելու տեղ չունենք»,-նշեց Եղոյանը:

Պատգամավորը հավելեց, որ Հայաստանը շարունակելու է իր ջանքերը, որպեսզի մեծանա միջազգային ճնշումն Ադրբեջանի վրա։
«ՄԻջազգային հանրության խոսքն ունենում է ազդեցություն․․․ Երբ քաղաքական ուժերի հարաբերակցությունը փոխվի, այդ ժամանակ էլ իրավիճակը գետնի վրա կփոխվի:

Կարծում եմ՝ կա հավանականություն, որ ճանապարհը կբացվի՝ հաշվի առնելով երեկվա ելույթների հարաբերակցությունը: Կարևորը, որ հարցը մտավ միջազգային օրակարգ, կարևորը, որ այնտեղ հնչեցին ձևակերպումներ, որոնք Ադրբեջանը ոչ մի կերպ չէր ցանկանա, որ հնչեին: Այդ մասին իրենք ասացին: Կարևորը, որ հարցը միջազգայնացվեց և դա ինքնին արդեն իսկ գործիք է գետնի վրա իրավիճակը կա՛մ լավացնելու, կա՛մ ավելի վատը չտանելու»,-ընդգծեց Եղոյանը:

Մանրամասները՝ տեսանյութում։