Պատերազմի մեկնարկից ի վեր ՌԴ-ի և Ուկրաինայի քաղաքացիները սկսել են Թուրքիայում ավելի շատ անշարժ գույք գնել

Ուկրաինայում Ռուսաստանի սանձազերծած պատերազմի սկզբից ի վեր Թուրքիայում աճում է այդ երկրների քաղաքացիներին վաճառվող անշարժ գույքի թիվը, գրում է Անադոլու գործակալությունը։

Թուրքիայի վիճակագրական ինստիտուտի տվյալներով՝ այս տարվա հունվար-նոյեմբերին Թուրքիայում օտարերկրյա քաղաքացիներին վաճառված տների թիվը, նախորդ տարվա նույն ժամանակահատվածի համեմատ, աճել է 10,389 միավորով՝ հասնելով 61,741-ի։ Դրա հիմնական մասը վաճառվել է ՌԴ-ի և Ուկրաինայի քաղաքացիներին։ Այս երկրների քաղաքացիների կողմից ձեռք բերված բնակարանների թիվը հաշվետու ժամանակահատվածում աճել է 10,608 միավորով։

Տարվա առաջին 11 ամիսներին Թուրքիայում ամենամեծ թվով բնակարաններ գնել են Ռուսաստանի, Իրանի և Իրաքի քաղաքացիները։ Սակայն անցյալ տարվա համեմատ՝ Թուրքիայում նվազել է Իրաքի, Իրանի և Աֆղանստանի քաղաքացիների կողմից ձեռք բերված բնակարանների թիվը։

Ուշադրություն է գրավում այն, որ Ռուսաստանի և Ուկրաինայի միջև պատերազմի սկզբից այդ երկրների քաղաքացիները սկսել են ավելի շատ բնակարաններ գնել Թուրքիայում։ Այսպես, փետրվարին ռուսները Թուրքիայում գնել են 509 բնակարան։ Հաջորդող ամիսներին նրանց գնած տների թիվը շարունակել է աճել։

Ընդհանուր առմամբ, 11 ամսվա արդյունքներով, ռուսաստանցիները Թուրքիայում գնել են 2․575 բնակարան։

2021 թվականի մարտ-նոյեմբերին ռուսաստանցիները Թուրքիայում գնել են 3,975 բնակարան, 2022 թվականի նույն ժամանակահատվածում այդ թիվը հասել է 12,921-ի: Ընդհանուր առմամբ, Թուրքիայում ՌԴ քաղաքացիների կողմից գնված անշարժ գույքի թիվն աճել է 3,3 անգամ։

Ուկրաինայի քաղաքացիները ևս սկսել են ավելի շատ գույք գնել Թուրքիայում։ Փետրվարին ուկրաինացիները գնել են 111 բնակարան Թուրքիայում, այնուհետև այս ցուցանիշն արագ աճ է գրանցել։ Հունիսին ձեռք է բերվել 301 միավոր անշարժ գույք, նոյեմբերին՝ 277 միավոր։

2021-ի մարտ-նոյեմբերին ուկրաինացիենրը Թուրքիայում գնել են 946 միավոր բնակարան, այս տարվա նույն ժամանակահատվածում՝ 2,055 միավոր։ Այսպիսով, մարտ-նոյեմբեր ամիսներին Թուրքիայում Ուկրաինայի քաղաքացիների կողմից գնված բնակարանների թիվն աճել է 2,2 անգամ։

Էմմա Չոբանյան