Քաղաքականություն
20.12.2022 | 21:46
Թուրքիան քննադատել է Շվեդիայի մերժումը՝ արտահանձնել թուրք լրագրողին, որին Անկարան պահանջել էր Ստոկհոլմի՝ ՆԱՏՕ-ին անդամակցության հայտի վավերացման դիմաց։ Այս մասին հաղորդում է Agence France-Presse-ը, որին վկայակոչում է Turkish Minute-ը։
Հիշեցնենք, որ Շվեդիայի Գերագույն դատարանը նախօրեին արգելափակել էր վտարանդի թուրք լրագրող Բյուլենթ Քենեշի արտահանձնման գործընթացը։ Դատարանը նշել էր, որ «մի քանի խոչընդոտներ» կան անգլալեզու Today’s Zaman օրաթերթի նախկին գլխավոր խմբագիր Բյուլենթ Քենեշին հետ ուղարկելու համար, ում Թուրքիան մեղադրում է 2016 թվականին նախագահ Ռեջեփ Թայիփ Էրդողանին տապալելու փորձին մասնակցելու մեջ։ Ըստ դատարանի՝ Քենեշին ուղղված մեղադրանքներից մի քանիսը Շվեդիայում հանցագործություններ չեն համարվում, ինչը գործի քաղաքական բնույթի և Շվեդիայում նրա փախստականի կարգավիճակի հետ մեկտեղ՝ անհնար է դարձրել արտահանձնումը։
Թուրքիայի արտաքին գործերի նախարար Մևլութ Չավուշօղլուն լրագրողներին տված կարճ մեկնաբանությունում քննադատել է այդ որոշումը։
«Բյուլենթ Քենեշի արտահանձնման մեր դիմումի մերժումը շատ բացասական զարգացում է»,- ասել է նա։
Չավուշօղլուն ընդգծել է, որ այս ամսվա սկզբին Շվեդիայի կողմից մեկ անձի արտահանձնումը, որը կասկածվում է Քուրդիստանի աշխատավորական կուսակցությանն (PKK) անդամակցության մեջ, բավարար չէ Թուրքիայի հավանությունը ստանալու համար։
«Եթե նրանք ակնկալում են, որ կարող են վերադարձնել մեկ անձի, իսկ հետո փակել այս գործը, իրատեսական չէ։ Մենք այլևս չենք ցանկանում լավ խոսքեր լսել Շվեդիայից և Ֆինլանդիայից, մենք ցանկանում ենք տեսնել կոնկրետ քայլեր»,- ասել է թուրք պաշտոնյան։
Էմմա Չոբանյան
