Արտաշատի քաղաքապետը չի պատրաստվում հրաժարական տալ, ավագանին էլ չի պատրաստվում դադարեցնել բոյկոտը

Արտաշատի քաղաքապետ  Կարեն Բենիամինյանը չի հասկանում իր հրաժարականը պահանջող և ավագանու նիստերը բոյկոտող ավագանու անդամներին։

Այս մասին Factor.am-ի հետ զրույցում ասաց քաղաքապետը՝ նշելով, որ եթե ավագանու անդամները մտածում են ժողովրդի մասին, պետք է գան, մասնակցեն ավագանու նիստերին և բարձրացնեն քաղաքացիներին հուզուղ խնդիրները՝ բոյկոտի փոխարեն:

«Ավագանու նիստը բոյկոտում են, պահանջում են տեղական տուրքերի դրույքաչափերի նվազում, բայց չէ՞ որ այդ հարցը ներառված էր ավագանու մայիսի 4 -ի նիստի օրակարգում, թող գային քննարկեինք։ Պահանջում են արտոնություն տալ ազատամարտիկների ընտանիքներին և զրոյացնել տարիների ընթացքում կուտակած հարկերն ու տուրքերը։ Այդ հարցը ևս կքննարկենք ավագանու նիստում»,- ասաց քաղաքապետը՝ ընդգծելով, որ ինքը ժողովրդի կողմից ընտրված քաղաապետ է, պարտականությունները սկսել է կատարել 2017 թվականի նոյեմբեր ամսին, այնպես որ իրեն ժամանակ է հարկավոր կուտակված խնդիրներին լուծումներ տալու համար։

Դիտարկմանը՝ եթե նույն ժողովուրդն իրենից հրաժարական պահանջի, պատրա՞ստ է հեռանալ պաշտոնից, Կարեն Բենիամինյանը պատասխանեց․ «Եթե այդ հրաժարականի տակ հիմք կա, կարող ենք քննարկել, չհիմնավորված հրաժարականի պահանջի դեպքում՝ ոչ»: Քաղաքապետը դժվարացավ պատասխանել հարցին արդյոք կատարվողն իր դեմ արշա՞վ է, թե՝ ոչ։

Պատրաստվո՞ւմ են ավագանու նիստերի բոյկոտը շարունակել և քաղաքապետի հրաժարականի պահանջի համար հնարավոր ի՞նչ քայլերի են դիմելու՝  Factor.am-ը փորձեց հասկանալ ավագանու անդամներից։ 

Մեզ հետ զրույցում ավագանու անդամ Կամո Խաչատրյանն ասաց, որ նիստերի բոյկոտը շարունակելու են։

Ավագանու մեկ այլ անդամ՝ Գոռ Նազարյանն էլ նշեց, որ այս պահին քաղաքապետի հետ կոնսենսուսի գալու որևէ հիմք չկա․ «Ավագանու նիստերը շարունակելու ենք բոյկոտել, մենք ժողովրդի կողմից ենք ընտված և ունենք ժողովրդի աջակցությունը և քաղաքապետի հրաժարականն այնքան ժամանակ կպահանջենք, մինչև նա հեռանա»։