Հայաստանը կանգնած է ռիսկերի և սպառնալիքների առաջ․ ՀԱՊԿ գլխավոր քարտուղարը նշել է ՀՀ-ին օգնության միջոցառումների փաստաթղթի ստորագրման անհրաժեշտությունը

Հայաստանին օգնություն տրամադրելու միջոցառումների մասին ՀԱՊԿ խորհրդի որոշման նախագիծը պետք է ստորագրվի, սա, ըստ ՀԱՊԿ գլխավոր քարտուղար Ստանիսլավ Զասի, կարևոր է հենց Հայաստանի համար։ Զասն այս մասին ասել է Մոսկվայում կայացած կազմակերպության Խորհրդարանական վեհաժողովի նիստում, գրում է ՏԱՍՍ-ը։

«Պետությունների ղեկավարների հանձնարարությամբ Հայաստանում դիտորդական առաքելություն է աշխատել՝ գլխավոր քարտուղարի և մեր կազմակերպության օպերատիվ շտաբի պետի գլխավորությամբ։ Այդ աշխատանքի արդյունքում նախապատրաստվել է Հավաքական անվտանգության խորհրդի որոշման նախագիծը Հայաստանի Հանրապետությանն օժանդակություն ցուցաբերելու համատեղ միջոցառումների վերաբերյալ, որը դիտարկվել է Խորհրդի նոյեմբերի 23-ի նիստում։ ՀԱՊԿ պետությունների տարբեր դիրքորոշումների պատճառով հնարավոր չեղավ ընդունել այս նախագիծը։ Հուսով եմ, որ որոշակի վերանայումից հետո մենք կհասնենք այս որոշման նախագծի ստորագրմանը և այդ միջոցների ընդունմանը։ Ես վստահ եմ, որ դա անհրաժեշտ է, այդ թվում՝ Հայաստանի համար»,- ասել է նա։

Զասն ընդգծել է, որ հայ-ադրբեջանական սահմանին իրավիճակը շարունակում է ծանր մնալ։ Նրա խոսքով՝ չնայած տարածաշրջանում տիրող իրավիճակի վերաբերյալ ՀԱՊԿ անդամ երկրների տարբեր գնահատականներին՝ բոլոր պետությունները համաձայն են, որ ներկա պայմաններում Հայաստանը կանգնած է ռիսկերի և սպառնալիքների առաջ։

«Ուստի մշակվել է Հայաստանին օգնություն տրամադրելու միջոցառումների շարք՝ վեց կետ, որոնք հավանության են արժանացել բոլոր պետությունների կողմից, միջոցառումների բավականին ծանրակշիռ փաթեթ։ Սա ներառում է լրացուցիչ քաղաքական և դիվանագիտական աշխատանք՝ ապահովելու Հայաստանի տարածքային ամբողջականությունը, դիտորդական առաքելության երկարաձգումը ևս երկու ամսով, որն իր աշխատանքային խմբերը կտեղակայի սահմանի երկայնքով՝ դժվարին վայրերում, և դա մեզ թույլ կտա անհրաժեշտության դեպքում արագ անհրաժեշտ միջոցներ ձեռնարկել։ Դա նաև ռազմատեխնիկական օգնության տրամադրումն է»,- պարզաբանել է կազմակերպության գլխավոր քարտուղարը։

Տաթև Ֆռանգյան