Շինարարական փոս է ստեղծվում ու մնում․ եթե շինարարությունը սկսվել է՝ պիտի ավարտվի․ վարչապետ

Կառավարությունը քննարկում է «Հայաստանի Հանրապետության հարկային օրենսգրքում փոփոխություններ և լրացումներ կատարելու մասին», «Տեղական տուրքերի և վճարների մասին» օրենքում լրացումներ և փոփոխություններ կատարելու մասին» և «Անշարժ գույքի հարկով հարկման նպատակով անշարժ գույքի շուկայական արժեքին մոտարկված կադաստրային գնահատման կարգը սահմանելու մասին» օրենքում լրացումներ կատարելու մասին» օրենքների նախագծերը։

Նպատակը պետական և համայնքային սեփականություն հանդիսացող հողամասերի վրա կառուցված շինությունների՝ այդ թվում՝ ինքնակամ անշարժ գույքի հարկով հարկման ընթացակարգերի կատարելագործումը, ինչպես նաև անավարտ կիսակառույց շինությունները ավարտին հասցնելու համար խթաններ ստեղծելու նպատակով այդ շինությունների մասով հարկային բեռի վերանայումն է:

«Ականատես են լինում դեպքերի, երբ որևէ տեղում շինարարական փոս է ստեղծվում ու, վերջ, մնում է տարիներով։ Մենք բոլորս սովորում ենք դրան ու դա, կարծես թե, մեր մոտ դիտվում է նորմալ երևույթ, դե հիմա մարդ է, կսկսի, բայց ոչ մեկ չի արձանագրում, որ դա անհարգալից վերաբերմունք է հանրության նկատմամբ, անհարմարություններ է ստեղծում, խաթարում է միջավայրը», – վարչապետ Նիկոլ Փաշինյանը։

Նա նաև ընդգծեց, որ եթե շինթույլտվության ժամկետն ավատվում է, դրանից սկսած՝ այլ կարգի կարգավորումներ են լինելու, պետք է վճարվեն գույքային հարկեր, ու շինթույլտվությունները երկրորդ անգամ երկարացնելու համար պետք է այլ դրույքաչափերով վճարումներ անեն։

«Շինարարությունը սկսվեց, պետք է ավարտվի, չի կարող քաղաքի կենտրոնում կամ ոչ կենտրոնում, մայրուղու վրա ցելոֆաններով կիսաշինարարական աղբի մեջ կորած տարածքները հավերժ մնան, դա պետք է իր հետ բերի ֆինանսական հետևանքներ», – նշեց վարչապետը։ Նա չբացառեց, որ հետագայում ավելի խիստ մեթոդներ կկիրառեն։

Մանրամասները՝ տեսանյութում։