23.11.2024 | 00:35
Թրամփի հետ հեռախոսազրույցը տեղեկատվական էր, բայց նաև շատ պոզիտիվ. Փաշինյան. ՏԵՍԱՆՅՈՒԹ
Ծաղկաձորում անցկացվել է Հայաստանի «Նորարար գրադարաններ» ամենամյա 5-րդ աշխատաժողովը
Հասարակություն
01.12.2022 | 11:19
Նոյեմբերի 28-30-ը Ծաղկաձորում անցկացվել է Հայաստանի «Նորարար գրադարաններ» ամենամյա 5-րդ աշխատաժողովը. տեղեկացնում են ՀՀ ԿԳՄՍՆ-ից։
2017 թվականից ՀՀ կրթության, գիտության, մշակույթի և սպորտի նախարարության ենթակայությամբ գործող մարզային գրադարանները, Հայաստանի ազգային գրադարանը, Երևանի Ավ. Իսահակյանի անվան քաղաքային կենտրոնական գրադարանը, ինչպես նաև տարբեր համալսարանական գրադարաններ մասնակցում են այս յուրահատուկ աշխատարաններին:
Աշխատաժողովի նպատակն է քննարկել թվային տեխնոլոգիաների դարաշրջանում գրադարանային մարտահրավերները, ուսումնասիրել և տարածել գրադարանների լավագույն աշխատանքային փորձը, միջազգային գրադարանային նորությունները: Նորարար գրադարաններն ունեն իրենց առանձին ֆեյսբուքյան խումբը, ինչպես նաև սեփական կայքը, որտեղ պարբերաբար հետաքրքրող թեմաներով հրապարակումներ են արվում գրադարանային գործի աշխատակիցների համար:
«Նորարար գրադարաններ» աշխատարանների նախաձեռնությամբ նախորդ տարիներին մարզային 10 գրադարան ստեղծել է էջեր` գրադարանների մասին հոդվածներ տեղադրելով հայկական վիքիպեդիայում: Սեմինարներ են կազմակերպվել մեդիագրագիտության, կիբերանվտանգության և սոցիալական հարթակներում գրադարանների էջերի կառավարման ուղղությամբ:
Եռօրյա աշխատարանի շրջանակում մասնակից գրադարանների ներկայացուցիչները ներկայացրել են վերջին տարվա ընթացքում իրենց գրադարանների նորարար նախաձեռնությունները և ծրագրերը: Կազմակերպվել են քննարկումներ «Արդյունավետ հաղորդակցություն», «Համակարգիչների խնամք և պահպանություն», «Համակարգչային շտապ օգնություն», «ժամանակակից ստեղծարար ծրագրեր և գործիքակազմ», ինչպես նաև այլ թեմաներով:
Աշխատանքային նիստերը և քննարկումները վարել են Հայաստանի ազգային գրադարանի աշխատակից և «Նորարար գրադարաններ» աշխատարանների հիմնադիր Ներսես Հայրապետյանը, Երևանի ամերիկյան անկյան համակարգող Նելլի Խաչատրյանը, Լոռու մարզային գրադարանի ավտոմատացման բաժնի վարիչ Անդրանիկ Հովհաննիսյանը: Աշխատարանի հատուկ հյուրն էր «ABN» մեդիա հարթակի տնօրեն Նարեկ Նիկողոսյանը, որը վարել է նաև «PR և մարքետինգի գործիքները» թեմայով ինտերակտիվ քննարկումը:
Աշխատարանը կազմակերպել էր «Ամերիկյան անկյունների բարեկամների ասոցիացիա» հասարակական կազմակերպությունը: Եռօրյա աշխատանքներին մասնակցել և գրադարանային ոլորտի խնդիրների վերաբերյալ ելույթ է ունեցել ՀՀ ԿԳՄՍ նախարարության մշակութային ժառանգության և ժողովրդական արհեստների վարչություն գլխավոր մասնագետ (գրադարանային ոլորտի համակարգող) Նազիկ Հովասափյանը:
Մասնակից մարզային, համայնքային և քաղաքային գրադարանները ծեփագրիչներ են նվեր ստացել ասոցիացիայի կողմից, որը կօգտագործեն մանկապատանեկան խմբերի ծրագրերում:
