Պատվի հարց է․ Հայաստանը կարող է հույս դնել Ֆրանսիայի աջակցության վրա․ ֆրանսիացի պատգամավորներ

Եվրախորհրդարանի, Ֆրանսիայի Սենատի մի շարք պատգամավորներ Ֆրանսիայի Հանրապետության Ազգային ժողովի՝ Հայաստանին աջակցող և Ադրբեջանի նկատմամբ պատժամիջոցներ առաջարկող բանաձևի ընդունումից հետո թվիթերի իրենց միկրոբլոգներում գրառումներ են կատարել։

Եվրախորհրդարանի պատգամավոր Ֆրանսուա-Քսավյե Բելամի

«Ազգային ժողովում էական քվեարկություն. քաղաքական առճակատումները մարում են Հայաստանին սատարելու համար։ Հայաստանի և մեր իսկ ապագայի համար Ֆրանսիան պետք է անողոք գործի` կոնկրետ արտահայտելու մեր  ԱԺ-ի այս միաձայն հանձնառությունը»,- գրել է պատգամավորը՝ հեշթեգում նշելով #Հայաստան #Արցախ։

Եվրախորհրդարանի պատգամավոր, Եվրոպական հարցերով նախկին նախարար Նատալի Լուազո

«Հպարտ եմ իմ երկրով. շնորհակալություն ֆրանսիացի պատգամավորներին, որոնք սենատորներից հետո հանձնառու են պաշտպանել Հայաստանը։ Կհանդիպենք Եվրախորհրդարանում»,- գրել է Լուազոն՝ հեշթեգում նշելով #Կանգնիր Հայաստանի կողքին։

Ավրոր Բերժե, պատգամավոր

«Հայաստանը դաշնակից երկիր է, բարեկամ երկիր, եղբայր։ Մենք պետք է նրա կողքին լինենք։
Մեր վեհաժողովի կողմից միաձայն ընդունված բանաձևով մենք հստակորեն վերահաստատում ենք դա՝ ի դեմս Ադրբեջանի ագրեսիայի»,- գրել է Բերժեն։

Անն-Լորանս Պետել․ պատգամավոր, Տնտեսական հարցերի հանձնաժողովի փոխնախագահ

«Քիչ առաջ Ազգային ժողովում միաձայն ընդունեցինք Հայաստանին աջակցելու և Ադրբեջանի ագրեսիան դադարեցնելու պահանջով բանաձևը։ Մենք ուժեղ ուղերձ ենք հղում Հայաստանին, որը կարող է հույս դնել Ֆրանսիայի և նրա պատգամավորների աջակցության վրա»,- գրել է Պետելը։

Իսկ մինչ բանաձևի քվեարկությունը ելույթ ունենալիս, պատգամավորը մասնավորապես նշել է․ «Հաշվի առնելով Հայաստանի և Ֆրանսիայի ընդհանուր պատմությունն ու արժեքները՝ ԱԺ-ն պետք է բարձր աջակցություն և խաղաղության ուղերձ հղի հայությանը։ Դա պատվի հարց է։ Սա է այս բանաձևի  միջնորդության իմաստը»։

Նշենք, որ վերոնշյալ բանաձևը ներկայացվել էր Ֆրանսիայի Սենատի մեծամասնության՝ իշխանական «Վերածնունդ» խմբակցության անունից։

Հիշեցնենք նաև, որ նույնաբովանդակ բանաձև ընդունվել էր նաև  նոյեմբերի 15-ին Ֆրանսիայի Հանրապետության Սենատում։  Հայաստանին աջակցող և Ադրբեջանի նկատմամբ պատժամիջոցներ առաջարկող բանաձևն ընդունվել էր 295 կողմ և 1 դեմ ձայների հարաբերակցությամբ։ Այդ բանաձևը ներկայացրել էին սենատորներ Բրունո Ռըտայոն, Քրիստիան Կամբոնը, Էլիան Ասասին, Պատրիկ Կանները, Էրվե Մարսեյը և Ժիլբեր-Լյուկ Դըվինազը։

Անահիտ Խաչատրյան