14.10.2026 | 12:56
ՌԴ-ն զանգվածային հարված է հասցրել Կիևին․ 3 մարդ զոհվել է, քաղաքի մի մասը մնացել է առանց էլեկտրականության
Ուղևորափոխադրողները առաջիկայում կմասնակցեն հայտարարվող մրցույթներին, որի ընթացքում պետք է հաղթահարեն ուղևորների սպասարկման որակի և անվտանգության նվազագույն շեմը
Տնտեսություն
06.06.2018 | 19:39
ՀՀ կառավարությունում հունիսի 6-ին ՀՀ փոխվարչապետի աշխատակազմի ղեկավարի մոտ տեղի ունեցավ հանդիպում ՀՀ տրանսպորտի, կապի և տեղեկատվական տեխնոլոգիաների նախարարության պաշտոնյաների և բողոքի ակցիաների մասնակից միջպետական ոչ կանոնավոր ուղևորափոխադրումներ իրականացնող կազմակերպությունների ներկայացուցիչների միջև: Ուղևորափոխադրողները մեկ անգամ ևս ներկայացրին իրենց խնդիրները և պահանջները, նաև դրանց լուծման իրենց տարբերակները. տեղեկացնում է ՀՀ տրանսպորտի, կապի և տեղեկատվական տեխնոլոգիաների նախարարության լրատվական ծառայությունը:
Նրանք պահանջում են ժամանակավորապես կասեցնել իրենց գործունեության համար սահմանված 50.000 և 150.000 ՀՀ դրամ հարկերի և պետական տուրքի վճարումը և օրենսդրական փոփոխությամբ վերադառնալ նախկին՝ լիցենզավորման համակարգին:
Հանդիպման ընթացքում քննարկվեցին ստեղծված իրավիճակի լուծման հնարավոր տարբերակներ՝ կարևորելով պետության, փոխադրողների և ուղևորների շահերը։
Առաջարկված խնդիրները բաժանվեցին երկու խմբի՝ ներկայում ստեղծված իրավիճակի արագ կարգավորում, հետագայում՝ ճանապարհային քարտեզի մշակում և դրանից բխող օրենսդրական փոփոխությունների իրականացում:
Կողմերի միջև ձեռք բերվեց պայմանավորվածություն, ըստ որի՝ միջպետական կանոնավոր ուղևորափոխադրումներ իրականացնելու և փոխադրողների միջև հավասար մրցակցային պայմաններ ապահովելու նպատակով փոխադրողները կարող են մասնակցել առաջիկայում հայտարարվող մրցույթներին, որի ընթացքում պետք է հաղթահարեն ուղևորների սպասարկման որակի և անվտանգության նվազագույն շեմը:
Մրցույթները թափանցիկ իրականացնելու համար առաջարկվեց մրցութային հանձնաժողովներում ընդգրկել հասարակական կազմակերպությունների և մասնագիտական որակավորում ունեցող ներկայացուցիչների:
