ՌԴ հարվածներն Ուկրաինայի էներգետիկ համակարգին վտանգում են միլիոնավոր ուկրաինացիների կյանքը․ ԱՀԿ

Ուկրաինայի էներգետիկ ոլորտը ոչնչացնելու Ռուսաստանի փորձերը այս ձմռանը վտանգի տակ կդնեն միլիոնավոր ուկրաինացիների կյանքը, ասել է Առողջապահության համաշխարհային կազմակերպության եվրոպական գրասենյակի ղեկավար Հանս Անրի Կլյուգեն, փոխանցում է BBC-ի ռուսական ծառայությունը։
«Ուկրաինայի էներգետիկ ենթակառուցվածքի կեսը վնասվել կամ ավերվել է։ Սա արդեն ազդում է առողջապահության համակարգի և մարդկանց առողջության վրա։ Պարզ ասած՝  այս ձմեռ մարդիկ կկանգնեն գոյատևման խնդրի առաջ»,- ասել է Կլյուգեն Կիևում կայացած ճեպազրույցում։

ԱՀԿ-ի գնահատականների համաձայն՝ առաջիկա ձմռանը ևս երկու-երեք միլիոն ուկրաինացիներ կարող են լքել իրենց տները «ջերմություն և անվտանգություն փնտրելու համար»: Երկրի բնակիչները ջեռուցման և լույսի բացակայության պայմաններում սովորականից ավելի շատ են բախվում շնչառական վարակների, գրիպի և կորոնավիրուսի հետ։

Ըստ ԱՀԿ ներկայացուցչի՝ հարյուրավոր հիվանդանոցներ և առողջապահական այլ հաստատություններ արդեն իսկ չեն կարողանում նորմալ աշխատել էլեկտրաէներգիայի և ջրի պակասի հետևանքով։ Ծննդատներին անհրաժեշտ են ինկուբատորներ, արյան բանկերին՝ սառնարաններ, ինտենսիվ թերապիայի բաժանմունքներին՝ օդափոխիչներ, որոնք բոլորն էլ էներգիա են պահանջում:

ԱՀԿ-ն անհանգստացած է նաև Դոնեցկում ՄԻԱՎ 17000 վարակակիրների ճակատագրով, որոնք շուտով կարող են բախվել հակառետրովիրուսային դեղամիջոցների պակասին: Դոնեցկի շրջանի մեծ մասը գտնվում է Ռուսաստանի վերահսկողության տակ, և Կլյուգեն կոչ է արել մարդասիրական բժշկական միջանցք ստեղծել բոլոր նոր օկուպացված ու ազատագրված տարածքներում: Աճող մտահոգություն կա նաև կորոնավիրուսային վարակով հիվանդացածների թվի աճի վերաբերյալ։

Օրերս Ուկրաինայում ձյուն է տեղացել, ջերմաստիճանը իջել է զրոյից,իսկ ձմռանը ջերմաստիճանը կարող է իջնել մինչև -20 աստիճան և ցածր:

Զապորոժիեի ԱԷԿ-ը, որն արտադրում էր Ուկրաինայում էլեկտրաէներգիայի ավելի քան 25%-ը, այժմ գործնականում չի շահագործվում։ Անցած շաբաթվա վերջին այն կրկին թիրախավորվել էր։