Զապորոժիեի ԱԷԿ-ի տարածքում կրկին պայթյուններ են որոտացել

Նոյեմբերի 19-ի երեկոյան և նոյեմբերի 20-ի առավոտյան Զապորոժիեի ատոմակայանի տարածքում պայթյուններ են հնչել, ինչի հետևանքով վնասվել են ԶԱԷԿ-ի որոշ շենքեր, համակարգեր և սարքավորումներ: Այս մասին հայտնել է Ատոմային էներգիայի Միջազգային գործակալությունը (ՄԱԳԱՏԷ), գրում է DW-ի ռուսական ծառայությունը:

ՌԴ Պաշտպանության նախարարությունը պնդում է, որ պայթյունները տեղի են ունեցել Դնեպրոպետրովսկի մարզի Մարգանեց բնակավայրից Ուկրաինայի Զինված ուժերի կողմից կայանի գնդակոծման հետևանքով։

«Նոյեմբերի 19-ի ընթացքում Ուկրաինայի զինված ուժերի հրետանին 11 խոշոր տրամաչափի հրետանային արկ է արձակել ատոմակայանի տարածքի ուղղությամբ։ Նոյեմբերի 20-ի առավոտյան էլ ուկրաինական զորքերը երկու անգամ գնդակոծել են ատոմակայանի տարածքը»,- ասել է Կոնաշենկովը։

Ուկրաինական «Էներգոատոմն» իր հերթին հայտնել է, որ կայանը գնդակոծվել է ռուսական զորքերի կողմից։ Ընկերության տվյալներով՝ վնասված ԶԱԷԿ-ի սարքավորումների բնույթն ու ցանկը ցույց են տալիս, որ ռուսները նպատակաուղղված հարվածներով անջատել են ենթակառուցվածքը, որն անհրաժեշտ էր 5-րդ և 6-րդ էներգաբլոկները գործարկելու և Ուկրաինայի կարիքների համար էլեկտրաէներգիայի արտադրությունը վերսկսելու համար։

Ըստ ՄԱԳԱՏԷ-ի, որի դիտորդները գտնվում են կայանում, վնասը միջուկային անվտանգության համար դեռևս կրիտիկական չէ:

«Մեր թիմից երեկ և այսօր առավոտյան ստացած լուրերը չափազանց անհանգստացնող են: Այս խոշոր ատոմակայանի վայրում պայթյուններ են տեղի ունեցել, ինչը լիովին անընդունելի է։ Ով էլ կանգնած լինի սրա հետևում, պետք է անհապաղ կանգ առնի։ Ինչպես ես բազմիցս ասել եմ՝ դուք կրակի հետ եք խաղում»,- ասել է ՄԱԳԱՏԷ-ի գլխավոր տնօրեն Ռաֆայել Գրոսսին։

Տաթև Ֆռանգյան