Իրաքում և Սիրիայում Թուրքիայի օդուժի գործողությունները տասնյակ մարդկանց կյանքեր են խլել

Թուրքիայի իշխանությունները նախօրեին հայտարարել էին, որ ռազմաօդային գործողություն են իրականացրել Սիրիայի և Իրաքի հյուսիսում, իբր, քուրդ զինյալների դեմ, որոնք օգտագործվում են թուրքական հողի վրա «ահաբեկչական հարձակումներ իրականացնելու համար», գրում է France 24-ը։

Թուրքիան այս գործողությունը սկսել է Ստամբուլի նոյեմբերի 13-ի պայթյունից հետո, որի իրականացման  համար մեղադրում է PKK-ին, թեպետ վերջինը հերքել է թուրքական պաշտոնական այդ պնդումները։

Սիրիայի մարդու իրավունքների դիտորդական խումբը (SOHR) հայտնում է, որ Սիրիայի հյուսիս-արևելյան և հյուսիս-արևելյան շրջաններում գրոհների հետևանքով սպանվել է առնվազն 31 մարդ։

«Օպերացիան հաջողությամբ իրականացվել է՝ որպես ահաբեկչությունն իր սկզբնաղբյուրում արմատախիլ անելու և Հյուսիսային Իրաքում և Սիրիայում մեր ժողովրդի և անվտանգության ուժերի դեմ ահաբեկչական հարձակումները կանխելու մեր ռազմավարության մի մաս», – ասվում է Թուրքիայի Պաշտպանության նախարարության հայտարարության մեջ:

SOHR-ի տվյալներով՝ մոտ 25 ավիահարված է հասցվել Ռաքա, Հասակե և Հալեպ նահանգներին, ինչի հետևանքով զոհվել է քրդերի գլխավորած «Սիրիայի դեմոկրատական ուժերի» 18 անդամ, սիրիական բանակի 12 անդամ և մեկ լրագրող։

Սիրիայի հյուսիս-արևելքում քրդական իշխանությունները հայտնում են 29 զոհի մասին, այդ թվում՝ 11 խաղաղ բնակիչ, 15 մարտիկ՝ կապված սիրիական բանակի հետ, երկու պահակ և մեկ քուրդ զինյալ։ Թուրքիայի իշխանությունները, ինչպես միշտ, հերքել են խաղաղ բնակավայրերի թիրախավորումը։

Էմմա Չոբանյան