«Ես ՀԱԿ-ի հետ երբեք դաշնակից չեմ եղել, որևէ մեկը չի կարող ինձ դավաճան համարել». Արարատ Զուրաբյան

«Ծառուկյան» դաշինքով ԱԺ պատգամավոր ընտրված ՀՀՇ վարչության նախագահ Արարատ Զուրաբյանը factor.am-ի հետ զրույցում անդրադառնում է ԱԺ «Ծառուկյան» դաշինքի կազմում իր ինտրիգային համագործակցությանը, մանդատը վայր դնելու, այնուհետև վերցնելու որոշմանը՝ պնդելով, որ հակասություններ չունի «Ծառուկյան» դաշինքում:

«Գագիկ Ծառուկյանն անձամբ խնդրեց, որ վերցնեմ մանդատս, և մենք իրար հետ աշխատենք: Ես ո՛չ սեպտեմբերին, ո՛չ հոկտեմբերին մանդատս վայր չեմ դնելու»,- ասաց Զուրաբյանը՝ պատասխանելով հարցին, թե իր համար ընդունելի էր այն, ինչ տեղի ունեցավ «Ծառուկյան» դաշինքում:

«Շատ հարցերում ունենք նույն, շատ մոտ տեսակետներ: Կաշկանդված չեմ ինչ-որ բանով արտահայտելու իմ մտքերը կամ քվեարկելու այնպես, ինչպես խիղճս է տալիս»,- հավաստիացրեց պատգամավորը:

Արարատ Զուրաբյանը համաձայն չէ, որ սահմանադրական փոփոխությունների շուրջ Սերժ Սարգսյանի հետ համաձայնության եկած, այժմ «Ծառուկյան» դաշինքի հետ համագործակցող ՀՀՇ-ին կարող է սպառնալ մարդ-կուսակցության ճակատագիրը՝ անգամ ՀՀՇ-ից Ալեքսանդր Արզումանյանի ու Կարապետ Ռուբինյանի հեռացումից հետո:

Հարցին, թե համագործակցություն կա՞ նախկին դաշնակից ՀԱԿ-ի հետ, թե՞ իրեն դավաճան են համարում, Արարատ Զուրաբյանն արձագանքեց. «Ես ՀԱԿ-ի հետ երբեք դաշնակից չեմ եղել, որևէ մեկը չի կարող ինձ դավաճան համարել, որովհետև ես երբեք իմ մոտեցումները, սկզբունքները չեմ փոխել: Փոխել են այլոք»:

Պատգամավոր Արարատ Զուրաբյանը նաև չի թաքցնում, որ բիզնես ունի, և դա իր ընտանիքին է պատկանում, սակայն պնդում է, որ բիզնեսը պաշտպանելու համար նաև չի մտել «Ծառուկյան» դաշինք: «Ես պաշտպանվելու խնդիր չունեմ իմ երկրում, ինձնից թող փորձեն պաշտպանվել»:

Մանրամասները դիտեք Factor.am-ի հետ ՀՀՇ վարչության նախագահ Արարատ Զուրաբյանի հարցազրույցում:

Մարինե Խառատյան