Հայկական պատվիրակությունը հասել է ՆԱՏՕ, բայց չի խոսել ռուս-թուրքական ռազմական համագործակցության և С 400-ի մասին

Ազգային ժողովում մեկնարկել է ՆԱՏՕ-ի խորհրդարանական վեհաժողովին մասնակցած հայկական պատվիրակություն ճեպազրույցը։

Պատվիրակության ղեկավար,  ԱԺ ՀՀԿ խմբակցության պատգամավոր Կորյուն Նահապետյանը նշեց, որ վեհաժողովի ընթացքում կարևորվել է Հայաստանի կամրջող դերը ԵՏՄ-ի և ԵՄ-ի միջև, ինչպես նաև շեշտվել է, որ Հայաստանը շարունակում է ՆԱՏՕ-ի համար մնալ վստահելի գործընկեր։

«ՆԱՏՕ-ի խորհրդարանական վեհաժողովում անդրադարձ է եղել Հայաստանի ներքաղաքական զարգացումներին, և պատգամավորները կարողացել են ներկայացնել իրենց տեսակետները և՛ ներքաղաքական, և՛ անվտանգային հարցերի վերաբերյալ»,- ասաց պատգամավորը։

Հարցին՝ արդյոք այս համաժողովի ընթացքում քննարկվել է ռուս-թուրքական ռազմական համագործակցության հարցը՝ մասնավորապես Թուրքիայի կողմից ռուսական С 400-ների գնումը, Կորյուն Նահապետյանը պատասխանեց, որ թեև այս նստաշրջանի օրակարգում ընդգրված չէր այդ հարցը, սակայն ՆԱՏՕ անդամ պետությունների կողմից զենքի վաճառքի հետ կապված երկկողմ հանդիպումների ժամանակ այն  բարձրաձայնվել է․ «Նախորդ տարի խորհրդարանական վերաժողովի տարբեր պատվիրակներ իրենց խորը մտահոգություններն են հայտնել С 400 համակարգերի ձեռբքերման վերաբերյալ և տպավորությունն այնպիսինն էր, որ ՆԱՏՕ-ի անդամ պետությունները չեն ողջունում Թուրքիայի կողմից С 400 համակարգերի գնումը»։ 

Դիտարկմանն՝ իսկ ինչու այդ հարցը իրենք չեն բարձրացրել, պատգամավորը նշեց, որ իրենք խոսել են միայն օրակարգից բխող հարցերի վերաբերյալ։ «Նպատակահարմար չենք համարում բարձրացնել մի խնդիր, որը չի ունենալու համարժեք ընկալում խորհրդարանական վերաժողովում։ Ի դեպ, ասեմ՝ եթե նախորդ անգամները ադրբեջանական պատվիրակությունն անընդհատ խոչընդոտում էր հայկական պատվիրակության աշխատանքները և բարձրացնում էր հարցեր, որոնք կապ չունեին համաժողովի օրակարգի հետ, ապա այս տարի ադրբեջանական պատվիրակները որևէ մասնակցություն չեն ունեցել համաժողովի աշխատանքներին»,-ասաց Կորյուն Նահապետյանը՝ հույս հայտնելով, որ ռուս-թուրքական ռազմական համագործակցության հարցը, հավանաբար, քննարկվի ՆԱՏՕ-ի տարեկան նստաշրջանի ընթացքում։