11.04.2026 | 22:24
Այցելել եմ երեկվա ողբերգական վթարից տուժած փոքրիկներին․ Ավանեսյան
Ուկրաինական և ռուսական զորքերը պատրաստվում են խիստ ձմռանը
Քաղաքականություն
18.11.2022 | 18:35
Ուկրաինական խիստ ձմեռը, երբ օդի ջերմաստիճանը կարող է նվազել մինչև -30 աստիճանի, արագորեն մոտենում է։ Եղանակային պայմանները մեծ ազդեցություն կունենան ռուսական ներխուժող զորքերի հետ պատերազմի ընթացքի վրա, հայտարարել է Ուկրաինայի պաշտպանության նախարար Ալեքսեյ Ռեզնիկովը, գրում է VOA-ն։
«Սա գլխավոր խոչընդոտն է ամբողջ ռազմական արշավի համար։ Եթե անձրև է գալիս, ստիպված պետք է կանգ առնեք, քանի որ չեք կարող օգտագործել անվավոր զրահամեքենաները կամ զրահափոխադրիչները: Կարող են օգտագործվել միայն թրթուրավոր մեքենաներ: Եթե ձյուն է գալիս, ապա պատասխանը նույնն է։ Եթե ձյուն չկա, իսկ գետինը սառած է, կարող եք օգտագործել անվավոր մեքենաներ։ Այսպիսով, արշավի հաջորդ փուլն ամբողջությամբ կախված է եղանակից»,- ասել է Ռեզնիկովը Reuters-ին:
Վերջին շաբաթներին ուկրաինական ուժերն առաջընթաց են գրանցել՝ իրենց վերահսկողության տակ վերադարձնելով Խերսոն քաղաքը։ Նրանք մտադիր են հետագայում ևս հաջողությունների հասնել մարտի դաշտում։ Ենթադրվում է, որ ուկրաինական ուժերը Խարկովից կարող են շարժվել դեպի հարավ՝ Ազովի ծովի ափին գտնվող ավերված Մարիուպոլ քաղաքը։
Ամերիկացի պաշտոնաթող գեներալ Բեն Հոջեսը մատնանշում է ռուսական զորքերի խոցելիությունը։
«Նրանք խրամատներ կփորեն, բայց դա լայն բաց տարածք է [Ուկրաինայի հարավում], որտեղ հեշտ կլինի թիրախավորել ռուսներին»,- ասել է նա Reuters-ին:
Խերսոնից և Խարկովից ստիպված լինելով նահանջել՝ ռուսական զորքերն այժմ խրամատներ են փորում: Ուկրաինան հայտարարել է, որ Ռուսաստանը հսկայական տարածքներ է ականապատել երկրի արևելքում, տասնյակ կամուրջներ են պայթեցվել։
Երկու կողմերի համար էլ դժվար կլինի առաջընթաց գրանցել, կարծում է Մեծ Բրիտանիայի Պաշտպանական հետազոտությունների թագավորական ինստիտուտի վերլուծաբան Ջասթին Բրոնքը։
«Ցանկացած զորավարժություններ մեծապես կապված են լինելու ճանապարհներից: Եվ հետևաբար, երկու կողմի համար էլ ավելի դժվար կլինի շարժվել առանց հրետանու կրակի տակ ընկնելու, քանի որ նրանց շարժումներն ավելի կանխատեսելի կլինեն»,- ասել է Բրոնքը «VOA»-ին։
«Սա կարող է խորացնել բարոյահոգեբանական անջրպետը ռուսական զորքերի միջև, որոնք ավելի ու ավելի շատ են ապավինում շատ սահմանափակ պատրաստվածություն ունեցող ժամկետային զինծառայողների վրա, և ուկրաինական ուժերի միջև, որոնք նույնքան ծանր պայմաններում են, բայց ավելի մեծ շահագրգռվածություն ունեն պաշտպանել իրենց տները», – ասել է Բրոնքը:
Տաթև Ֆռանգյան
