Քաղաքականություն
16.11.2022 | 18:26
Իսրայելցի միլիարդատիրոջ հետ կապված նավթատար նավը Օմանի ափերի մոտ հարձակման է ենթարկվել ռումբեր կրող անօդաչու թռչող սարքի կողմից Իրանի հետ լարվածության ֆոնին։ Այս մասին Associated Press-ին հայտնել է սեփական աղբյուրը։ Հարձակումը տեղի է ունեցել երեքշաբթի գիշերը Օմանի ափերի մոտ, ասել է Մերձավոր Արևելքի պաշտպանության ոլորտում աշխատող պաշտոնյան: Պաշտոնյան խոսել է անանունության պայմանով, քանի որ նրանք իրավունք չունեն հրապարակայնորեն քննարկելու հարձակումը, գրում է The Washington Post-ը:
Տարածաշրջանում Մեծ Բրիտանիայի Ծովային առևտրի գործակալությունը AP-ին հայտնել է, որ տեղյակ է միջադեպի մասին։
«Մենք տեղեկացված ենք միջադեպի մասին, այս պահին այն հետաքննվում է»,- ասել է աղբյուրը։
Պաշտոնյան պարզաբանել է, որ հարձակման ենթարկված նավը հանդիսանում է Լիբերիայի դրոշի ներքո գտնվող Pacific Zircon նավթատարը: Այն շահագործում է Սինգապուրում գտնվող Eastern Pacific Shipping-ը, որն իսրայելցի միլիարդատեր Իդան Օֆերին պատկանող ընկերություն է:
Eastern Pacific Shipping-ի հայտարարության մեջ ասվում է, որ նավթատար նավը խոցվել է արկով՝ Օմանի ափից մոտ 150 մղոն (240 կիլոմետր) հեռավորության վրա:
«Մենք կապի մեջ ենք նավի հետ։ Տուժածների կամ ջրի աղտոտվածության մասին տեղեկություններ չկան: Անձնակազմի բոլոր անդամներն ապահով են։ Նավի կմախքը փոքր-ինչ վնասվել է, բայց բեռի արտահոսք կամ ջրի ներթափանցում չկա»,- ասել են ընկերությունից:
Տաթև Ֆռանգյան
