Քաղաքականություն
13.11.2022 | 14:10
Կիևն ու Վաշինգտոնը ծրագրում են Ուկրաինայի տարածքում փոքր մոդուլային ռեակտոր կառուցել։ Այս մասին կիրակի օրը հայտարարել է ԱՄՆ-ում Ուկրաինայի դեսպան Օքսանա Մարկարովան, հաղորդում է ՏԱՍՍ-ը:
«Այսօր ՄԱԿ-ի կլիմայական 27-րդ համաժողովի շրջանակներում ԱՄՆ նախագահի հատուկ բանագնաց Ջոն Քերրին և Ուկրաինայի էներգետիկայի նախարար Գերման Գալուշչենկոն հայտարարեցին Ուկրաինայում մոդուլային ռեակտորի կառուցման փորձնական նախագծի մեկնարկի մասին։ »,- գրել է նա Մարկարովան Facebook-ի իր էջում:
Նրա խոսքով՝ փորձնական նախագծի մասնակիցներն են Արգոնի ազգային լաբորատորիայի միջազգային կոնսորցիումը, ուկրաինական Էներգոատոմը, Ուկրաինայի ազգային անվտանգության և պաշտպանության խորհուրդը և Ուկրաինայի միջուկային և ճառագայթային անվտանգության պետական գիտատեխնիկական կենտրոնը։ Մյուս մասնավոր գործընկերներից են Clark Seed-ը, Doosan Enerbity-ն, FuelCell Energy-ն, IHI Corporation-ը, JGC Corporation-ը, Samsung C&T Corporation-ը և Starfire Energy-ն:
Փոքր մոդուլային ռեակտորներն ավելի փոքր են, քան ատոմակայաններում տեղադրվածները: Դրանք կարող են տեղադրվել դժվարամատչելի վայրերում, որտեղ հնարավոր չէ մեծ ատոմակայաններ կառուցել։
