05.11.2024 | 23:30
ԱՄՆ նախագահական ընտրությունների արդյունքները դժվար թե վերականգնեն Թուրքիայի հետ հարաբերությունները. անդրադարձ
Վտանգավոր իրավիճակ է. Փաշինյանի խոսքը ԱՄՆ-ին, ՌԴ-ին է ուղղված, որ կայունություն լինի. Հակոբ Բադալյան․ ՏԵՍԱՆՅՈՒԹ
Քաղաքականություն
11.11.2022 | 19:32
Վարչապետ Նիկոլ Փաշինյանը հայտարարում է, որ ՀՀ-ն ունի միայն մեկ պարտավորություն՝ ապահովել տրանսպորտային կապը Ադրբեջանի Արևմտյան շրջանների և Նախիջևանի միջև։ Ալիևը դժգոհել էր, թե ՀՀ-ն չի կատարում իր պարտականությունները և ճանապարհային կապ չի տալիս։ Եվ ի դեպ, Փաշինյանը կասկածում է, որ Հայաստանին մեղադրելով պարտավորությունները չկատարելու մեջ՝ Ալիևը փորձում է մտացածին հիմքեր ստեղծել Լաչինի միջանցքը փակելու, արցախահայությանը շրջափակելու և ցեղասպանելու համար։ Ալիևը Սամարղանդում արձագանքնել է վարչապետին՝ հերքելով, որ այդպիսի մտադրություն ունի։ Բայց Ադրբեջանի ղեկավարը բազմիցս է ապացուցել, որ անում է իր ասածի հակառակը։
Factor TV-ի հարցազրույցում քաղաքական մեկնաբան Հակոբ Բադալյանին հարց ուղղեցինք՝ տեսնո՞ւմ է ինքը Լաչինի միջանցքը փակելու և շրջափակելու վտանգ։ Պարոն Բադալյանը կասկած չունի՝ հենց Ադրբեջանը տեսնի ռազմական իր առավելությունն օգտագործելու հնարավորություն, անպայմանորեն գնալու է այդ քայլին։ Երկու գործոն կա՝ ռազմական բալանսը, որի վրա է այսօր խաղում Ալիևը՝ իր առավելությունը կապիտալիզացնելու փորձ անելով, և երկրորդը քաղաքական միջավայրն է․
«Եթե նա տեսավ քաղաքական միջավայր, որտեղ կարող է ուժի կիրառումը մարսվել, անպայման գնալու է այդ քայլին։ Բալանսի հարցում, ցավոք սրտի, իրավիճակը նրա օգտին է։ Քաղաքական միջավայրի առումով՝ Ադրբեջանի համար կան հնարավորություններ սադրանքի և շանտաժի քաղաքականությունը շարունակելու, բայց կա նաև ՀՀ-ի համար հնարավորություն՝ այդ ամեն ինչի դեմ քաղաքական արգելապատնեշներ ստեղծելու՝ մինչև կգա ժամանակ, երբ ուժերի հավասարակշռությունն այնպիսի իրավիճակի կբերի, որ ՀՀ-ն արդեն հաստատուն մեխանիզմներով երկարաժամկետ կայունության մեխանիզմներ կձևավորի»։
Ըստ Հակոբ Բադալյանի՝ իրավիճակն այսօր զարգանում է վտանգահարույց տրամաբանությամբ, և ՀՀ վարչապետի վերջին ելույթները դրա տողատակերը պարունակում են․ «Կարծում եմ՝ այդ վտանգներն արտահայտելով՝ Երևանը փորձում է միջազգային ուշադրություն հրավիրել։ Նրա ելույթները, թվիթերյան գրառումները, ես կարծում եմ, ավելի շատ ուղղված են ՌԴ-ին, ԱՄՆ-ին։ Մենք՝ որպես հասարակություն և պետություն, պետք է առավելագույն պատասխանատվության առաջ դնենք այն բոլոր դերակատարներին, որոնք միջնորդ են՝ նախաձեռնություններ ունեն և խոսում են այստեղ կայունության և խաղաղության մասին։ Պետք է ձգտենք նրանց բոլորին առավելագույն պատասխանատվության առաջ դնել»,- նշեց քաղաքական մեկնաբանը։
Հարցազրույցն ամբողջությամբ՝ տեսանյութում։
Ռոբերտ Անանյան
