13.05.2026 | 23:30
Ադրբեջանը հիշատակվում է Պենտագոնի կողմից հրապարակված չբացահայտված թռչող օբյեկտների ֆայլերում
ՌԴ-ն պահանջում է ՀՀ-ից՝ ФСБ-ի հսկողությամբ ճանապարհ տալ․ Ադրբեջանի դեմ չի աջակցում այդ պատճառով․ Արմեն Բաղդասարյան. ՏԵՍԱՆՅՈՒԹ
Քաղաքականություն
11.11.2022 | 19:02
Ռուսաստանը հատուկ նպատակադրմամբ չի կատարել ՀՀ-ի նկատմամբ անվտանգային պարտավորությունները 2020-ից ի վեր Ադրբեջանի ռազմական ագրեսիաների ժամանակ։ Ըստ քաղաքական մեկնաբան Արմեն Բաղդասարյանի՝ ՌԴ-ն գտնում է, որ ՀՀ-ն չի կատարել նոյեմբերի 9-ի հայտարարությամբ ստանձնած պարտավորությունը, որն է՝ Ադրբեջանի արևմտյան հատվածները Նախիջևանին կապող ճանապարհ, որի վերահսկողությունը կլինի ՌԴ ԱԴԾ-ի հսկողության ներքո։ Factor TV-ի հարցազրույցում փորձեցինք պարզել քաղաքական մեկնաբանից՝ ինքը կհամաձայնվե՞ր, եթե ՀՀ իշխանությունը այդպիսի պայմանով միջանցք տրամադրեր ՌԴ-ին․ «Չէի համաձայնվի, բայց Նիկոլ Փաշինյանը ստորագրել է, թող չստորագրեր»,- պատասխանեց պարոն Բաղդասարյանը։
Հիշեցրինք՝ Նիկոլ Փաշինյանն այսօրինակ մեղադրանքներին ի պատասխան՝ բերում է նոյեմբերի 10-ին Պուտինի հրամանագիրը, ըստ որի՝ ՌԴ ԱԴԾ-ն պետք է վերահսկողություն իրականացներ ճանապարհների ապաշրջափակման՝ ՀՀ-ի պարտականության կատարման վրա, ինչից բխում է, որ ՌԴ ԱԴԾ-ի գտնվելը ճանապարհին չպիտի լինի ՀՀ-ի սուվերենության զիջմամբ։ Արմեն Բաղդասարյանն ասաց․
«Այդ հայտարարությունները վկայում են այն մասին, որ հակասություններ կան Հայաստանի և Ռուսաստանի դիրքորոշումների միջև։ Այդ պատճառով էլ ՌԴ-ն միանշանակ չի համարում, որ ՀՀ-ն կատարել է նոյեմբերի 9-ով ստանձնած պարտավորությունները։ Նա տեսնում է, որ Ադրբեջանը չի կատարել, բայց քանի որ շահ ունեն Մեղրիի ճանապարհը վերահսկելու հարցում, համարում են, որ Հայաստանը չի կատարել։ Ինչից բխում է, որ ՌԴ-ն չի էլ աջակցելու ՀՀ-ին ռազմական ագրեսիաների պարագայում, կամ էլ աջակցության դիմաց չափազանց բարձր գին են ուզելու»,- ասաց Արմեն Բաղդասարյանը։
Հարցազրույցն ամբողջությամբ՝ տեսանյութում։
Ռոբերտ Անանյան
