«Ազատությո՛ւն», «Հրաժարակա՛ն»․ Բաքվում ոստիկանությունը բիրտ ուժով ցրել է ընդդիմության հավաքն ու ձերբակալել ցուցարարներին

Բաքվում ոստիկանությունը հերթական անգամ բռնի ուժով ցրել է ընդդիմադիրների բողոքի ակցիան, գրում են տեղական լրատվականները։

Մասնավորապես, նշվում է, որ ակցիան սկսվել է ժամը 16։00-ի սահմաններում Բաքվի գործադիր իշխանության շենքի մոտ՝ ի նշան բողոքի հավաքների ազատության սահմանափակման։ Սակայն ոստիկանությունը սկսել է ուժով բերման ենթարկել ցուցարարներին դեռ մետրոյի Իչերի Շեհեր կայարանի մոտ գտնվող հրապարակում։

Այնտեղ հայտված ցուցարարները պարբերաբար վանկարկել են «Ազատությո՛ւն», «Հրաժարակա՛ն», «Արդարությո՛ւն, ազգային իշխանություն» և այլ կարգախոսներ։

Ոստիկանները ձերբակալել են նրանց ու տարել հատուկ ավտոբուսներ, սակայն ավտոբուսներում ցուցարարները շարունակել են վանկարկումները։ Ոստիկնությունը բիրտ ուժ է կիրառում՝ խոչընդոտներ ստեղծելով նաև լրագրողների աշխատանքի համար։ Տասնյակ ցուցարարներ են ձերբակալվել։ Ցույցի մեկնարկից առաջ՝ դեռևս առավոտյան, ոստիկանությունը սկսել էր ընդդիմադիրներին տներից ձերբակալել։

Ակցիայի կազմակերպիչը ընդդիմադիր «Ժողովրդական ճակատ» կուսակցությունն է՝ հավաքների ազատություն, ցամաքային սահմանների բացման, քաղբանտարկյալների ազատ արձակման, ազատ և ժողովրդավարական բարեփոխումների իրականացման պահանջով։

Հավելենք, որ սեպտեմբերի 30-ին և հոկտեմբերի 24-ին ընդդիմությունը փորձել էր Միլլի Մեջլիսի և Բաքվի քաղաքապետարանի մոտ հանրահավաքներ անցկացնել, սակայն ոստիկանությունն ուժի կիրառմամբ կասեցրել էր այն և ձերբակալել կազմակերպիչներին ու մասնակիցներին։

Էմմա Չոբանյան