12.12.2024 | 15:32
ԼՂ-ից բռնի տեղահանված ՄԿՈւ հաստատությունների սովորողներն ուսման վարձի փոխհատուցում կստանան
Քանի դիրք է գրավել հակառակորդը․ ՊՆ-ն տեղեկատվությունը համարում է պետական գաղտնիք
Քաղաքականություն
11.11.2022 | 11:55
Քանի որ վերջին շաբաթներին ՀՀ տարբեր բարձրաստիճան պաշտոնյաներ և պատգամավորներ տարբեր թվեր են ներկայացնում 2020 թվականի 44-օրյա պատերազմից հետո Ադրբեջանի կողմից զավթված ՀՀ ինքնիշխան տարածքի մակերեսի վերաբերյալ՝ Factor.am-ը գրավոր հարցմամբ դիմել էր Պաշտպանության նախարարություն՝ խնդրելով հստակեցնել, թե 2020 թվականի նոյեմբերի 9-ից հետո Ադրբեջանի ԶՈւ-ն Հայաստանի Հանրապետության միջազգայնորեն ճանաչված տարածքից քանի՞ քառակուսի կիլոմետր է զավթել։
«Ներկայում ընթանում են անհրաժեշտ տեղեկատվության ճշգրտման, համադրման և վերլուծության աշխատանքներ, որի արդյունքներով համապատասխան տեղեկությունների վերաբերյալ ՊՆ-ն հանդես կգա պաշտոնական հաղորդագրությամբ»,- ասված է պաշտպանական գերատեսչության պատասխանում։
Խնդրել էինք նաև թվով նշել, թե հակառակորդը սեպտեմբերյան երկօրյա ռազմական գործողությունների ժամանակ քանի մարտական հենակետ է գրավել։ Գերատեսչությունն այս մասով պատասխան չի տվել՝ այն որակելով պետական գաղտնիք։
Հիշեցնենք՝ իշխանական պատգամավոր Արմեն Խաչատրյանը ՀԱՊԿ ԽՎ նիստում հայտարարել էր, որ Ադրբեջանը, ընդհանուր առմամբ, 2021-2022 թվականներին վերահսկողության տակ է վերցրել Հայաստանի Հանրապետության մոտ 127 քառակուսի կիլոմետր սահմանամերձ տարածք: Սեպտեմբերյան ադրբեջանական գործողությունների օրերին՝ սեպտեմբերի 14-ին՝ Նիկոլ Փաշինյանը ասել էր, որ այդ պահի դրությամբ 10 քառակուսի կմ է օկուպացվել՝ չհաշված 2021-ի առաջխաղացումները: Վերջերս էլ ՀՀ ԶՈւ ԳՇ պետ Էդվարդ Ասրյանն էլ Ազգային ժողովում լրագրողների հետ ճեպազրույցում ասաց, որ, եթե հաշվարկները կատարվում են հակառակորդի առաջնագծից մեր համապատասխան խորություններում, որտեղ հակառակորդը հաջողություն է ունեցել և օկուպացրել մեր ինքնիշխան տարածքից, ապա դա կազմում է մոտ 130 քառակուսի կիլոմետր և ավելի տարածք։
Արփի Հակոբյան
