Ռուսաստանը Խերսոնից հետ քաշվելու «մանևր» է սկսել․ ուկրաինացի զինվորականները մեկը մյուսի հետևից զբաղեցնում են գյուղերը

Այն բանից հետո, երբ ռուսական բանակն ուկրաինական զորքերի ճնշման ներքո սկսեց զանգվածաբար լքել Խերսոնի շրջանը դեպի Դնեպրի աջ ափ, Կիևը հայտարարեց մի քանի տասնյակ բնակավայրերի ազատագրման մասին։ Միաժամանակ, ուկրաինացի զինվորականները նշում են, որ բուն Խերսոնում դեռևս շատ ռուս զինծառայողներ կան և երկար ժամանակ կպահանջվի քաղաքը լքելու համար։

Միաժամանակ, կրեմլամետ և ուկրաինական Telegram ալիքները լի էին չհաստատված տեղեկություններով, որ Դնեպրը անցնելու փորձի ժամանակ ռուսական զորքերի վրա կրակ է բացվել, գրում է BBC-ի ռուսական ծառայությունը:

Տարածաշրջանում այս պահին ամենակարևոր քաղաքը, որը վերադարձել է ուկրաինական վերահսկողության տակ, Նիկոլաևի շրջանի Սնիգիրյովկան է։ Այս բնակավայրը գտնվում է Խերսոնի վարչական շրջանի սահմանի մոտ և ունի ռազմավարական նշանակություն։ Սնիգիրյովկան ռուսական բանակի կարևոր հենակետն էր, քանի որ գտնվում է տրանսպորտային խաչմերուկում և, փաստորեն, ճանապարհ է բացում դեպի Խերսոն։

Ուկրաինայի ԶՈՒ Գլխավոր շտաբն իր երեկոյան զեկույցում փոխանցել է Զինված ուժերի հրամանատար, գեներալ Վալերի Զալուժնիի խոսքերն այն մասին, որ վերջին մեկ օրում ուկրաինական բանակը 12 բնակավայր է ազատագրել Խերսոնի և Նիկոլաևի շրջանում։ Գլխավոր շտաբը հստակեցրել է, որ բնակավայրեր են ազատագրվել երկու ուղղությամբ, յուրաքանչյուրում՝ վեցական։

Ուկրաինացի զինվորականները խոսում են օրվա ընթացքում յոթ կիլոմետր խորությամբ նախկինում օկուպացված տարածքներ մտնելու մասին։

Ուկրաինայի նախագահ Վլադիմիր Զելենսկին էլ գիշերային տեսաուղերձում հայտարարել է, որ ուկրաինական բանակն արդեն ազատագրել է 41 բնակավայր երկրի հարավում։

Ռուսաստանի Պաշտպանության նախարարությունը բավականին հակիրճ է մեկնաբանում Խերսոնի շրջանում տեղի ունեցող իրադարձությունները։ Գերատեսչության ներկայացուցիչ Իգոր Կոնաշենկովն ամենօրյա ճեպազրույցի ժամանակ հաստատել է զորքերի դուրսբերման փաստը՝ դա անվանելով «մանևր»։

Տաթև Ֆռանգյան