27.06.2026 | 20:57
Էդուարդ Սպերցյանը կտեղափոխվի Սաուդյան Արաբիա. աղբյուր
Խերսոնից ռուսական զորքերի տարհանումը ցույց տվեց Մոսկվայում «իրական խնդիրների» առկայությունը. Ջո Բայդեն
Քաղաքականություն
10.11.2022 | 13:36
ԱՄՆ նախագահ Ջո Բայդենը հայտարարել է, որ Դնեպրի աջ ափից՝ Խերսոնի մատույցներից զորքերը տարհանելու Կրեմլի հրամանը ցույց է տալիս, որ Մոսկվան «իրական խնդիրներ» ունի բանակի հետ, գրում է VOA-ն։
Միջանկյալ ընտրությունների արդյունքներին նվիրված մամուլի ասուլիսում Բայդենը նշել է այն փաստը, որ Ռուսաստանը սպասել է մինչև ԱՄՆ Կոնգրեսի ընտրությունների ավարտը, որպեսզի հայտարարի Ուկրաինայի հարավում ռազմավարական կարևոր տարածաշրջանային կենտրոնից դուրս գալու մասին։
«Սա խոսում է այն մասին, որ ռուս զինվորականներն իրական խնդիրներ ունեն»,- ասել է ԱՄՆ նախագահը։
Նա նշել է, որ զորքերի դուրսբերումը թույլ կտա երկու կողմերին վերանայել իրենց դիրքորոշումները ձմռանը, սակայն պետք է սպասել՝ հասկանալու համար՝ արդյո՞ք Ուկրաինան պատրաստ կլինի փոխզիջման գնալ Ռուսաստանի հետ։
Ներկայացուցիչների պալատի արտաքին հարաբերությունների հանձնաժողովի փոխնախագահ, հանրապետական Մայքլ Մաքքոլը նույնպես մեկնաբանել է Խերսոնից ռուսական զորքերի դուրսբերման մասին հայտարարությունը։
«Ռուսական նահանջը հաստատում է այն, ինչ ես և իմ գործընկերներից շատերը շեշտել ենք ամիսներ շարունակ. ճիշտ զենքի առկայության դեպքում Ուկրաինան կարող է հաղթել ներխուժած ռուսական ուժերին և բացահայտել Խերսոնը ու երեք այլ շրջաններ բռնակցելու՝ Պուտինի փորձի անհեթեթությունը։ Վաղուց ժամանակն է, որ Բայդենի վարչակազմը Կիևին տրամադրի բոլոր անհրաժեշտ զենքերը, այդ թվում՝ ավելի մեծ հեռահարության ATACMS-ը, որպեսզի Պուտինն ու բոլոր ագրեսորները հասկանան, որ չեն կարող հաղթել ոչնչով չհրահրված ագրեսիվ պատերազմում»,- ասել է Մաքքոլը:
Տաթև Ֆռանգյան
