Ուկրաինայում ՌԴ-ի կորուստներն արդեն մի քանի անգամ գերազանցել են Աֆղանստանում ԽՍՀՄ-ի կորուստները. Պենտագոն

Ռուսաստանը, հավանաբար, կորցրել է իր հիմնական մարտական ​​տանկերի կեսը և պատերազմում օգտագործել է իր ճշգրիտ կառավարվող զենքի մեծ մասը։ Այս մասին ասել է ԱՄՆ պաշտպանության նախարարի քաղաքական հարցերով տեղակալ Քոլին Քալը, գրում է BBC-ի ռուսական ծառայությունը:

Նրա խոսքով՝ Ուկրաինայում ռազմական արշավը մեծ ռազմավարական ձախողում էր Կրեմլի համար։

«Պուտինը ձախողել է, Ռուսաստանն այս պատերազմից դուրս կգա ավելի թույլ, քան մինչ դրա սկսվելն էր»,- Քալին է մեջբերում CNN-ը։

Պատժամիջոցներն ու արտահանման հսկողությունը շատ կդժվարացնեն ռուսական բանակի վերադարձը նախապատերազմյան մակարդակի, հավելել է ամերիկացի պաշտոնյան։ Նա նաև նշել է, որ Ուկրաինայում Ռուսաստանի կորուստներն արդեն մի քանի անգամ գերազանցել են Աֆղանստանում ԽՍՀՄ-ի կորուստները։

«Պուտինը գնացել է այս պատերազմին՝ փորձելով ոչնչացնել Ուկրաինան որպես անկախ, ինքնիշխան, ժողովրդավարական երկիր: Նա ձախողվեց, և դա չի փոխվի: Ինքնիշխան, անկախ, ժողովրդավարական Ուկրաինան կդիմանա»,- ասել է Քոլին Քալը:

Նա ընդգծել է, որ ԱՄՆ վարչակազմը ճնշում չի գործադրում Ուկրաինայի իշխանությունների վրա՝ դրդելով նստել Ռուսաստանի հետ բանակցությունների սեղանի շուրջ, և որ Ուկրաինան պետք է որոշի, թե երբ և ինչ պայմաններում պատրաստ կլինի սկսել բանակցային գործընթացը։

«Մեր դիրքորոշումն ուկրաինացիներին բանակցությունների մղելը չէ, քանի դեռ նրանք պատրաստ չեն: Այն կայանում է նրանում, որ նրանք կարողանան գործել ուժի դիրքերից, երբ պատրաստ լինեն [բանակցելու]»,- ասել է Պենտագոնի ներկայացուցիչը:

Քալը կանխատեսում է, որ ձմռան սկիզբը կբարդացնի լայնածավալ հարձակողական գործողությունները, իսկ Ուկրաինայում ռազմական գործողությունների ինտենսիվությունը կնվազի, ինչը դիվանագիտական ​​կարգավորման հնարավորություններ կստեղծի։

«Ի վերջո, ռուսներն ու ուկրաինացիները պետք է որոշեն, թե դա ինչ բարենպաստ հնարավորություններ է ընձեռում դիվանագիտության համար»,- ասել է պաշտպանության փոխնախարարը։

ԱՄՆ-ում Կոնգրեսի միջանկյալ ընտրությունների ֆոնին Քալը հարկ է համարել նշել, որ երկրի երկու խոշոր կուսակցություններն էլ հանդես են գալիս Ուկրաինային ուժեղ աջակցության օգտին, սակայն այդ աջակցության մեխանիզմները հետագայում կարող են փոխվել։

Տաթև Ֆռանգյան