14.12.2025 | 13:28
Բռնցքամարտի Հայաստանի հավաքականը պատմական արդյունքով է վերադարձել հայրենիք
Արցախցիներն արձագանքել են Նիկոլ Փաշինյանի կոչին. բողոքի ցույցերը դադարեցվել են. ՏԵՍԱՆՅՈՒԹ
Քաղաքականություն
04.06.2018 | 23:04
Արցախի Հանրապետության պետնախարար Արայիկ Հարությունյանը հանդիպել է Ստեփանակերտում բողոքի ցույց իրականացնող քաղաքացիներին և հանդես եկել հայտարարությամբ:
«Դուք նոր էջ եք բացել Արցախի պատմության մեջ: Առաջին անգամ անկախ Արցախում սկսել է շարժում` ուղղված պետականաշինությանը: Մենք տեղյակ ենք այս օրերին հնչած բոլոր պրոբլեմներին: Այսօր ձեր կողմից ընտրված նախագահ Բակո Սահակյանը հրավիրել է կառավարության ընդլայնված նիստ` կոնկրետ օրակարգով, հանձնարարականներով, նկատողություններով՝ ինձնից սկսած մինչև բոլոր նախարարներ: Եթե կան սխալներ, դա առաջին հերթին պաշտոնյաներինն է: Ձեր կողմից առաջացված բոլոր խնդիրներին լուծում է տրվելու»,- հավաստիացրել է պետնախարարը:
Այնուհետև ցույցի համակարգողներից Դավիթ Սիմոնյանը կարդացել է Բակո Սահակյանի հորդորը, ով խնդրել է ժամանակ տալ բոլոր հարցերին լուծում տալու համար: «Մենք նաև գոհ ու շնորհակալ ենք պարոն Նիկոլ Փաշինյանին, որ անդրադարձել է այս հավաքին, սա պատմական մի երևույթ է»,- ասել է Դավիթ Սիմոնյանը:
Հիշեցնենք, ու դրանից կարճ ժամանակ առաջ ՀՀ վարչապետ Նիկոլ Փաշինյանն ուղերձով դիմեց Ստեփանակերտում բողոքի ցույց իրականացնող քաղաքացիներին և հորդորեց դադարեցնել ցույցը՝ սպասելով ԱՀ Ազգային ժողովի ստեղծած հանձնաժողովի աշխատանքի արդյունքներին:
Նիկոլ Փաշինյանի հավաստիացմամբ՝ Բակո Սահակյանը պատրաստ է կատարել շարժման բոլոր պահանջները: Փաստորեն՝ Նիկոլ Փաշինյանի կոչն անարձագանք չմնաց:
Հ.Գ. Մեր տեղեկություններով վաղը նախատեսվում է երթ անցկացնել դեպի Արցախի նախագահի նստավայր:
Մարութ Վանյան, Ստեփանակերտ
