27.02.2026 | 12:00
Աննա Հակոբյանը հեռանում է կառավարական առանձնատնից // Զինվորի մահվան դեպքով ձերբակալված կա. ԼՈՒՐԵՐ
Հնդկաստանը կշարունակի ռուսական նավթ գնել
Քաղաքականություն
08.11.2022 | 22:16
Հնդկաստանը կշարունակի ռուսական նավթ գնել, քանի որ դա ձեռնտու է իր երկրի համար։ Այս մասին նոյեմբերի 8-ին իր ռուս գործընկեր Սերգեյ Լավրովի հետ հանդիպումից հետո ասել է արտգործնախարար Սուբրամանյամ Ջայշանքարը, փոխանցում է Reuters-ը։
Նշվում է, որ Հնդկաստանը Չինաստանից հետո դարձել է Ռուսաստանում նավթի ամենամեծ գնորդը։ Այդ երկրի նավթավերամշակման գործարանները ռուսական վառելիքը գնում են զեղչով։
Գործակալությունը հիշեցրել է, որ Նյու Դելին՝ աշխարհի երրորդ խոշորագույն նավթ ներկրողը և Մոսկվայի ավանդական դաշնակիցը, ուղղակիորեն չի դատապարտել Ռուսաստանի ներխուժումն Ուկրաինա, իսկ երեքշաբթի կայացել է Ջայշանքարի և Լավրովի այս տարվա հինգերորդ հանդիպումը։
«Մեր հիմնական պարտականությունն է՝ ապահովել հնդիկ սպառողին հնարավորինս բարենպաստ մուտք դեպի միջազգային (նավթ և գազ) շուկաներ: Այս առումով մենք տեսանք, որ Հնդկաստանի և Ռուսաստանի հարաբերությունները շահավետ են: Այսպիսով, եթե ձեռնտու է, ես այն կշարունակեմ»,- ասել է Հնդկաստանի ԱԳՆ ղեկավարը։
Հայտարարությունն արվել է այն ժամանակաշրջանում, երբ ԱՄՆ-ը և G-7-ի նրա դաշնակիցները քայլեր են ձեռնարկում՝ գների սահմանափակումով կանխելու Ռուսաստանի շահույթը նավթից, ընդգծել է Reuters-ը:
Ավելի վաղ լրատվամիջոցներին հայտնի էր դարձել, որ ռուսական ածուխի ներմուծման դեմ ԵՄ պատժամիջոցների սահմանումից հետո Թուրքիան, Հնդկաստանը և Չինաստանը, ինչպես նաև աֆրիկյան երկրներն այն գնում են էժան գնով։
Տաթև Ֆռանգյան
