Խերսոնը պատրաստվում է փողոցային մարտերի

Ուկրաինան Ռուսաստանին մեղադրել է Խերսոնում դատարկ տները թալանելու և դրանցում քաղաքացիական հագուստով զինվորականների տեղավորելու մեջ։ Կիևի պաշտոնյաներն ասում են, որ դա քաղաքում փողոցային մարտերի նախապատրաստման մի մասն է, որոնք երկու կողմերն էլ կանխատեսում են, և որոնք կլինեն պատերազմի ամենակարևոր մարտերից, գրում է Euronews-ը։

Կրեմլի կողմից նշանակված իշխանություններն օկուպացված տարածաշրջանում հայտարարել են, այսպես կոչված, «տարհանումների» ավարտի մասին. Կիևը դա անվանում է բռնի տեղահանում և ռազմական հանցագործություն։ Մոսկվայի կողմից վերահսկվող պաշտոնյաները տեսանյութ են հրապարակել, որում տարածաշրջանի բնակիչներով վերջին նավը շարժվում է դեպի Դնեպրի ձախ ափ։

Ռուսական օկուպացիայից ուկրաինական տարածք փախածներն ասում են, որ ստիպված են եղել թաքցնել իրենց հեռախոսները զինվորականներից, ընդ որում՝ չեն կարողացել կապ հաստատել արտաքին աշխարհի հետ։ Ռուսաստանը ռազմական դրություն է մտցրել և սահմանափակել է հաղորդակցությունը Ուկրաինայի չորս շրջաններում, որոնք հոկտեմբերի սկզբին իրենն է հայտարարել:

Նախօրեին ՌԴ նախագահ Վլադիմիր Պուտինն ասել էր, որ, այսպես կոչված, «հատուկ ռազմական գործողության» գոտում են 80 հազար մոբիլիզացվածներ կան, որոնցից 50 հազարը մասնակցում է ռազմական գործողություններին։ Ավելի վաղ Պուտինը հայտարարել էր, որ 300 հազար մարդու մասնակի մոբիլիզացման պլանը գերակատարվել է կամավորների հաշվին։

Մինչ այդ, ուկրաինական բանակը պնդում է, որ մոտենում է Խերսոնին: Նպատակը ռուսական զորքերի նյութատեխնիկական ապահովման և մատակարարման շղթան խաթարելն է՝ այնտեղ նրանց ներկայությունը դարձնելով անկայուն։

Տաթև Ֆռանգյան