Անտոնիո Գուտերեշը կոչ է արել շտապ քայլեր ձեռնարկել, քանի որ մոլորակն աղետի ազդանշան է ուղարկում

Աճող ջերմաստիճանի ծայրահեղությունները, անտառային հրդեհները, երաշտներն ու ջրհեղեղները կլիմայի տաքացման արդյունք են: Ըստ ՄԱԿ-ի նոր զեկույցի, որը ցույց է տալիս, որ աշխարհը խորը կլիմայական ճգնաժամի մեջ է, վերջին ութ տարիները կլինեն ռեկորդային ամենաշոգը, գրում է Euronews-ը:

Եգիպտոսում կլիմայի 27-րդ համաժողովի բացման ժամանակ ՄԱԿ-ի գլխավոր քարտուղար Անտոնիո Գուտերեշը կոչ է արել շտապ քայլեր ձեռնարկել, քանի որ «մոլորակն աղետի ազդանշան է ուղարկում»։

«Ինչպես համոզվել է Համաշխարհային օդերևութաբանական կազմակերպությունը՝ փոփոխությունները տեղի են ունենում աղետալի արագությամբ՝ ոչնչացնելով կյանքեր և կենսապահովման համակարգեր բոլոր մայրցամաքներում: Մենք պետք է արձագանքենք մոլորակի աղետի կոչին հավակնոտ, վստահելի կլիմայական գործողություններով: Եվ այս ամենի տեղը COP27-ի համաժողովն է, իսկ ժամանակը՝ հիմա»,- հայտարարել է Անտոնիո Գուտերեշը։

Աշխարհի ավելի քան 120 առաջնորդներ մասնակցում են ՄԱԿ-ի Կլիմայի 27-րդ համաժողովին։ Նրանք հինգ րոպեանոց ելույթներ կունենան՝ ներկայացնելով, թե ինչ են ակնկալում հանդիպումից:

Զարգացած երկրների համար երկու հիմնական նպատակն է՝ նվազեցնել ջերմոցային գազերի արտանետումները և արագացնել անցումը դեպի վերականգնվող էներգիայի աղբյուրներ: Մինչ զարգացող երկրները, որոնք կլիմայի փոփոխության դեմ պայքարի առաջնագծում են, ցանկանում են տեսնել նախկին ֆինանսավորման պարտավորությունների կատարումը:

Տաթև Ֆռանգյան