18.08.2026 | 11:53
Երևանի Գայի պողոտայում բախվել է 3 ավտոմեքենա․ կա 3 տուժած
Ադրբեջանում ընդդիմությունն Իրանի դեսպանատան մոտ բողոքի ակցիա է անցկացնելու՝ Թեհրանի «հակաադրբեջանական գործողությունների պատճառով»
Քաղաքականություն
07.11.2022 | 22:42
Ադրբեջանի և Իրանի հարաբերությունների գերլարվածության ֆոնին Բաքվի ընդդիմությունը պատրաստվում է Թեհրանի գործողությունների դեմ բողոքի ակցիա անցկացնել։ Ադրբեջանական լրատվականների հաղորդմամբ՝ «Մուսավաթ» կուսակցությունը նոյեմբերի 15-ին նախատեսում է Ադրբեջանում Իրանի դեսպանատան դիմաց բողոքի ակցիա անցկացնել։ Բաքվի գործադիր իշխանությանը հավաքի համար արդեն համապատասխան ծանուցում է ուղարկվել։
«Ակցիան անցկացվում է՝ ի նշան բողոքի Իրանի հակաադրբեջանական քաղաքականության և այդ երկրում խաղաղ ցույցերը դաժանորեն ճնշելու դեմ»,- ասվում է կուսակցության տարածած հայտարարության մեջ։
Ի դեպ, չի բացառվում, որ Ադրբեջանի իշխանությունները, որոնք արգելում են երկրում ցանկացած բողոքի ցույցերն ու հանրահավաքները, թույլ տան հակաիրանական այս ակցիան անցկացնել՝ հաշվի առնելով Բաքվի պետական քարոզչական մեքենայի՝ Իրանի դեմ ուղղված վերջին շրջանի գործողությունները։
Բացի այդ, Ադրբեջանի ընդդիմադիր «Ժողովրդական ճակատ» կուսակցությունն էլ նոյեմբերի 11-ին այլ հավաք է նախատեսում՝ արդեն իշխանություններից պահանջելու ժողովրդավարական բարեփոխումներ ու հավաքների ազատություն։ Սեպտեմբերի 30-ին ու հոկտեմբերի 24-ին ընդդիմադիրները փորձել էին հավաքներ կազմակերպվել, սակայն բռնի ուժով ու ձերբակալություններով ոստիկանությունը թույլ չէր տվել դրանք անցկացնել։
Էմմա Չոբանյան
