13.12.2024 | 23:31
Գերմանիան հավանություն է տվել 2006թ․ ի վեր զենքի ամենամեծ արտահանմանը Թուրքիա
Ղազախստանը պատրաստ է իր շահերը պաշտպանել ոչ միայն դիվանագիտական ճանապարհով․ Տոկաև
Քաղաքականություն
07.11.2022 | 14:46
Ղազախստանն իր ազգային շահերը կպաշտպանի ոչ միայն դիվանագիտությամբ, այլ նաև ավելի կոշտ դիրքերով։ Այս մասին հայտարարել է երկրի նախագահ Կասիմ-Ժոմարտ Տոկաևը, գրում է Tag news-ը։
«Չնայած աշխարհաքաղաքական բարդ իրավիճակին՝ երկրի անվտանգությունն ապահովվում է կառուցողական դիվանագիտության միջոցով։ Ղազախստանի սահմաններն օրինականորեն ամրագրված և սահմանազատված են։ Հենց Ակտաուում ավարտվեց մեր սահմանների հարցը։ 2018 թվականին այստեղ ստորագրվել է Կասպից ծովի իրավական կարգավիճակի մասին կոնվենցիան։ Մենք բարեկամական հարաբերություններ ենք պահպանում հարևան բոլոր երկրների հետ։ Սա այն հիմնական հատկանիշներից մեկն է, որը մեզ տարբերում է մյուսներից»,- ասել է Տոկաևը Մանգիստաու շրջանում հանրության հետ հանդիպման ժամանակ:
Նա նշել է, որ հետխորհրդային պետությունների մեծ մասում կան տարաբնույթ հակամարտություններ ու տարաձայնություններ, նույնիսկ Ղազախստանի ամենամոտ հարևանների սահմաններին՝ պատերազմներ ու զինված բախումներ են գրանցվում։
«Վերջին ամիսներին մեր պետության տեղեկատվական համակարգերը ենթարկվել են կիբերհարձակումների։ Նման դեպքերը հատկապես հաճախակի են դարձել ընթացիկ քաղաքական քարոզարշավի ընթացքում։ Մենք դա խստորեն ճնշելու ենք, ընդհուպ մինչև ապատեղեկատվության տարածման արգելքների ներդրումը։ Մենք պատրաստ ենք պաշտպանել մեր սուրբ անկախությունը։ Ես արդեն ասել եմ, որ մենք պատրաստ ենք ազգային շահերը պաշտպանել ոչ միայն դիվանագիտության օգնությամբ, այլև ավելի կոշտ դիրքերով։ Եվ սա մեր հաստատուն դիրքորոշումն է։ Բացի արտաքին քաղաքական օրակարգից՝ երկրում կայունության և անվտանգության վրա մեծ ազդեցություն ունի նաև ներքին իրավիճակը։ Քանի դեռ մեր երկրում և դրսում կան տարաձայնություններ և թշնամություն սերմանողներ, մենք չենք կարող անփութություն դրսևորել»,- ընդգծել է Տոկաևը։
Տաթև Ֆռանգյան
