09.10.2026 | 15:02
Հայտնի է «եկեղեցու շուրջ ճգնաժամն» ուսումնասիրող քննիչ հանձնաժողովի կազմը
Ջեյք Սալիվանը գաղտնի բանակցություններ է ունեցել Նիկոլայ Պատրուշևի հետ․ The Wall Street Journal
Քաղաքականություն
07.11.2022 | 12:14
Միացյալ Նահանգների նախագահի ազգային անվտանգության հարցերով խորհրդական Ջեյք Սալիվանը վերջին մի քանի ամիսների ընթացքում մասնավոր կապի մեջ է եղել ՌԴ Անվտանգության խորհրդի քարտուղար Նիկոլայ Պատրուշևի և ՌԴ նախագահի արտաքին քաղաքականության հարցերով խորհրդական Յուրի Ուշակովի հետ, հայտնում է The Wall Street Journal-ը՝ հղում անելով սեփական աղբյուրներին։ Նշվում է, որ այս խոսակցությունների նպատակն է եղել կանխել էսկալացիայի վտանգը և բաց պահել հաղորդակցության ուղիները։ Ընդ որում, այդ հեռախոսազրույցների փաստը պաշտոնապես չի հաստատել ոչ Սպիտակ տանը, ոչ էլ Կրեմլը։
«Այս ոչ հրապարակային քննարկումները տեղի են ունենում Վաշինգտոնի և Մոսկվայի միջև ավանդական դիվանագիտական շփումների անկման և Պուտինի ու նրա օգնականների ակնարկների ֆոնին, որ նա կարող է միջուկային զենք օգտագործել ՌԴ տարածքը պաշտպանելու համար»-, գրում է պարբերականը:
«Սպիտակ տունը կարծում է, որ Մոսկվայի հետ շփումների որոշակի մակարդակի պահպանումը անհրաժեշտ է ազգային անվտանգության ոլորտում որոշակի փոխադարձ շահերի հասնելու համար։
ԱՄՆ-ի մի քանի պաշտոնյաներ հայտարարել են, որ Սալիվանը ձգտում է շփումներ հաստատել Ռուսաստանի հետ, նույնիսկ եթե այլ բարձրաստիճան պաշտոնյաներ կարծում են, որ բանակցությունները ներկայիս դիվանագիտական և ռազմական իրավիճակում արդյունավետ չեն լինի:
Պաշտոնյաները չեն հայտնել բանակցությունների ճշգրիտ ժամկետներ կամ զանգերի քանակ, ոչ էլ ասել են, թե արդյոք դրանք արդյունավետ են եղել»,- նշում է հոդվածագիրը:
