Իրանն առաջին անգամ խոստովանել է անօդաչու թռչող սարքերի առաքումը Ռուսաստան

Իրանի արտգործնախարար Հոսեյն Ամիր Աբդոլլահիանը խոստովանել է, որ երկիրը Ռուսաստանին անօդաչու սարքեր է մատակարարել։ BBC-ի ռուսական ծառայության փոխանցմամբ՝ հայտարարությունը, որում Թեհրանն առաջին անգամ պաշտոնապես հաստատել է մատակարարումները, հնչել է Իրանի ԱԳ նախարարի մամուլի ասուլիսի ժամանակ։

Նրա խոսքով՝ մատակարարումն իրականացվել է նախքան Ուկրաինա ռուսական ներխուժումը։

«Մենք Ռուսաստանին սահմանափակ քանակությամբ անօդաչու սարքեր ենք փոխանցել Ուկրաինայի պատերազմից մի քանի ամիս առաջ»,- ասել է նախարարը:

Աբդոլլահիանը «միանգամայն սխալ» է անվանել Թեհրանի կողմից Ուկրաինայում ռազմական գործողությունների համար Ռուսաստանին հրթիռներ և անօդաչու թռչող սարքեր մատակարարելու մասին հաղորդագրությունները՝ հավելելով, որ Իրանը կողմ է Ուկրաինայում պատերազմի դադարեցմանը:

Թեհրանը «անտարբեր չի մնա», եթե ապացույցներ հայտնվեն պատերազմում Ռուսաստանի կողմից իրանական անօդաչու թռչող սարքերի օգտագործման մասին, նշել է նա:

Իրանի ԱԳ նախարարի հայտարարությունը հնչել է մի քանի ամսվա ընթացքում Ուկրաինայում իրանական անօդաչու թռչող սարքերի օգտագործման, այդ թվում ՝ էներգետիկ ենթակառուցվածքների և քաղաքացիական օբյեկտների վրա հարձակումների քննարկման ֆոնին։

Վերջին շաբաթներին Ուկրաինան հայտնում է քաղաքացիական ենթակառուցվածքի օբյեկտների վրա անօդաչու սարքերի հարձակումների աճի մասին, մասնավորապես, խոսքը իրանական Shahed-136 արտադրության դրոնների օգտագործման մասին է: Ռուսաստանը հերքում է Ուկրաինայում իրանական անօդաչու սարքերի կիրառումը։