Նյու Դելիի բոլոր դպրոցները փակվել են օդի աննախադեպ աղտոտվածության պատճառով

Բնապահպանական ծանր իրավիճակի պատճառով, որը սպառնում է մարդկանց կյանքին և առողջությանը, Հնդկաստանի մայրաքաղաքի իշխանությունները հայտարարել են Նյու Դելիի բոլոր դպրոցները փակելու մասին։ Մեծահասակներին խորհուրդ է տրվում մնալ տանը և աշխատել հեռակա կարգով: Այս մասին հայտարարել է քաղաքի քաղաքապետ Արվինդ Քեջրիվալը։

Reuters-ի փոխանցմամբ՝ Նյու Դելին իրավամբ համարվում է աշխարհի ամենաաղտոտված օդ ունեցող մայրաքաղաքը, և, ըստ բժիշկների, այնտեղ ապրելը վտանգավոր է դարձել։ Ամեն աշուն և ձմեռ Հնդկաստանի մայրաքաղաքում աղտոտված մշուշ է գոյանում, երբ ցուրտ, թանձր օդը քաշում է շենքերի փոշին, արդյունաբերական և մեքենաների արտանետումները:

Դրան գումարվում է նաև մայրաքաղաքի շրջակա գյուղական շրջանների այրվող դաշտերից եկող թունավոր ծուխը։ Բացի այդ, հայտնի է, որ Նյու Դելին գտնվում է փոսում և այդ պատճառով քաղաքում օդը չի փոխվում։

Իրավիճակը հատկապես վատ է Գուրգաոն, Նոյդա և Ղազիաբադ արվարձաններում, որտեղ մարդիկ բառացիորեն շնչահեղձ են լինում օդի կտրուկ վատթարացման պատճառով։ Քաղաքացիները բողոքում են շնչահեղձությունից և աչքերի ցավից, կտրուկ ավելացել են բուժհաստատություններ դիմողների թիվը։ Արդյունքում ամեն տարի բնակչության մոտ 20%-ը տառապում է շնչառական հիվանդություններից, ասթմայից և ալերգիաներից։

Ըստ հնդիկ բնապահպանների՝ աղտոտված օդը միջինը վեց տարով նվազեցնում է քաղաքի բնակիչների կյանքի տևողությունը։

«Երկուշաբթի օրվանից բոլոր դպրոցները փակ կլինեն, բայց կարող են շարունակել գործունեությունը հեռահար կարգով։ Իշխանությունների պնդմամբ՝ Նյու Դելիի պետական հիմնարկները պետք է անցնեն հեռահար աշխատանքի ձևաչափի»,- հայտարարել է Հնդկաստանի մայրաքաղաքի կառավարության ղեկավարը։

Ուսումնական հաստատությունները փակելու որոշումը, ըստ Reuters-ի, կայացվել է այն բանից հետո, երբ մտահոգ ծնողներն ու բնապահպանները սոցիալական ցանցերի միջոցով դիմել են քաղաքային իշխանություններին՝ պահանջելով փրկել երեխաների առողջությունը։

Հնդկաստանի աղտոտման վերահսկման դաշնային խորհուրդն իր հերթին արգելել է դիզելային բեռնատարների մուտքը, ինչպես նաև դադարեցրել է տարածաշրջանում շինարարության և քանդման աշխատանքների մեծ մասը՝ սկսած երկուշաբթի օրվանից:

Տաթև Ֆռանգյան