20.04.2026 | 23:38
Ովքեր են «Հանրապետություն» կուսակցության ցուցակում․ հրապարակվել են առաջին 30 անունները
Նեթանյահուն վերադարձավ․ Իսրայելի հեռացող վարչապետ Լապիդը շնորհավորել է նրան հաղթանակի կապակցությամբ
Քաղաքականություն
04.11.2022 | 14:13
Իսրայելի վարչապետ Յաիր Լապիդը շնորհավորել է Բենիամին Նեթանյահուին նոյեմբերի 1-ին կայացած խորհրդարանական ընտրություններում տարած հաղթանակի կապակցությամբ։ Անցյալ տարի վարչապետությունից հեռացված Նեթանյահուն հաղթականորեն վերադառնում է իշխանության։
Բենիամին Նեթանյահուի «Լիքուդ» կուսակցությունը և նրա դաշնակիցները՝ ծայրահեղ աջերն ու կրոնական ուղղափառ կուսակցությունները, ստացել են Կնեսետի 120 մանդատներից 64-ը։ Հինգշաբթի, երբ պարզ դարձան ընտրությունների վերջնական արդյունքներ, հեռացող վարչապետ Յաիր Լապիդը զանգահարել է Նեթանյահուին, շնորհավորել և վստահեցրել, որ կապահովի իշխանության կանոնավոր փոխանցումը, գրում է BBC-ի ռուսական ծառայությունը։
Այս ընտրությունները վերջ դրեցին Իսրայելի քաղաքականության քաոսային փուլին, որը սկսվեց 2019 թվականին, երբ այն ժամանակ վարչապետ Բենիամին Նեթանյահուն մեղադրվեց կոռուպցիայի մեջ: Այդ մեղադրանքներով դատաքննությունը դեռ շարունակվում է, հաջորդ նիստը կկայանա երկուշաբթի։
Քվեարկությունից անմիջապես հետո, երբ հրապարակվեցին exit poll-ի արդյունքները, Նեթանյահուն իր կողմնակիցներին հայտարարել է, որ ապագա կառավարությունը հոգ կտանի Իսրայելի բոլոր քաղաքացիների մասին։
«Մենք կվերադարձնենք անվտանգությունը, կզսպենք բարձր գները, կընդլայնենք խաղաղության օղակը [Իսրայելի շուրջ], Իսրայելը կվերադարձնենք աճող տերությունների շարքը»,- ասել է Նեթանյահուն։
Այս ընտրություններից հետո Իսրայելի խորհրդարանը մնում է բավականին մասնատված։ Նեթանյահուի «Լիքուդը» ստացել է 32 մանդատ, Յաիր Լապիդի կենտրոնական «Յեշ Աթիդ» կուսակցությունը՝ 24, ծայրահեղ ազգայնական կրոնական «Սիոնիզմ» կուսակցությունը՝ 14, իսկ գործող պաշտպանության նախարար Բենի Գանցի աջ կենտրոնամետ «Ազգային միաբանություն» կուսակցությունը՝ 12:
Եվս երկու ծայրահեղ ուղղափառ հրեական կուսակցություններ ստացել են 11 և 7 մանդատ, մեկ աշխարհիկ ազգայնական կուսակցություն՝ 6, Իսրայելի երկու արաբական կուսակցությունները՝ 5-ական, իսկ լեյբորիստները՝ 4 մանդատ։ Կառավարություն ձևավորելու համար Նեթանյահուին կոալիցիա է անհրաժեշտ. ընտրություններից հետո նա դեռ ուղղակիորեն չի ասել, թե ում է որպես գործընկեր դիտարկում, սակայն ակնկալվում է, որ նրանց թվում կլինի նաև կրոնական «Սիոնիզմ»-ը։
Տաթև Ֆռանգյան
