31.10.2026 | 15:50
Արթուր Ոսկանյանը, Հովհաննես Հակոբյանն ու Էրիկ Հովսեփյանը՝ ԱԱ բրոնզե մեդալակիրներ
Աշխարհն արագորեն կորցնում է սառցադաշտերը․ Կիլիմանջարոյում, Դոլոմիտներում և ԱՄՆ-ում մինչև 2050թ․ դրանք կհալվեն
Քաղաքականություն
03.11.2022 | 22:47
ՄԱԿ-ի համաշխարհային ժառանգության օբյեկտների շուրջ մեկ երրորդում սառցադաշտերը կհալվեն երեք տասնամյակի ընթացքում, ասվում է ՅՈՒՆԵՍԿՕ-ի զեկույցում: Դրանց թվում են Կիլիմանջարո լեռան վերջին սառցադաշտերը, Ալպերի սառցադաշտերը և ԱՄՆ-ի Յոսեմիտի ազգային պարկը:
Դրանք կհալվեն՝ անկախ կլիմայի փոփոխության դեմ պայքարող աշխարհի գործողություններից, կարծում են զեկույցի հեղինակները, գրում է BBC-ի ռուսական ծառայությունը։
Զեկույցը, որը կանխատեսումներ է անում արբանյակային տվյալների հիման վրա, հրապարակվել է հաջորդ շաբաթ Եգիպտոսում կայանալիք կլիմայի փոփոխության COP27 համաժողովից առաջ։ Ընդհանուր առմամբ, ՄԱԿ-ի համաշխարհային ժառանգության 50 օբյեկտներում հայտնաբերվել է մոտ 18․600 սառցադաշտ: Դրանք կազմում են Երկրի սառցակալած տարածքի գրեթե 10%-ը և ներառում են հայտնի զբոսաշրջային վայրեր և սրբավայրեր տեղի բնակչության համար:
Սառցադաշտերի նահանջը և անհետացումն ամենավառ ապացույցներից մեկն է, որ Երկրի կլիման տաքանում է, ասվում է զեկույցում:
«Մենք հուսով ենք, որ կարող ենք սխալվել, բայց մեր ձեռքում գիտական ապացույցներ կան։ Սառցադաշտերը կլիմայի փոփոխության կարևոր ցուցիչներից են, քանի որ դրանք տեսանելի են, իրապես կարող եք այն տեսնել»,- ասել է զեկույցի հեղինակներից մեկը՝ ՅՈՒՆԵՍԿՕ-ի ծրագրի ղեկավար Թալես Կարվալյո Ռեսենդեն։
ՄԱԿ-ի Համաշխարհային ժառանգության օբյեկտների մնացած երկու երրորդում սառցադաշտերը դեռ հնարավոր կլինի փրկել, բայց միայն այն դեպքում, եթե աշխարհը սահմանափակի գլոբալ տաքացումը մինչև 1,5 աստիճան Ցելսիուսի, նշում են զեկույցի հեղինակները:
Անցյալ շաբաթ հրապարակված ՄԱԿ-ի մեկ այլ զեկույցում ասվում է, որ մարդկության համար այս նպատակին հասնելու հուսալի ուղիներ ներկայում չկան:
Տաթև Ֆռանգյան
