Քաղաքականություն
03.11.2022 | 16:48
Հայաստանի վարչապետ Նիկոլ Փաշինյանի Թեհրան այցին զուգահեռ՝ Ադրբեջանի պետական անվտանգության ծառայությունը մեղադրանքներ է հնչեցնում Իրանի հասցեին։ Այս մասին գրում է իրանական պետական IRNA գործակալությունը՝ արձագանքելով Բաքվի այն պնդումներին, թե Ադրբեջանում բացահայտվել է անօրինական զինված խումբ, որը, իբր, ստեղծվել է իրանական հատուկ ծառայությունների վերահսկմամբ։«Անվտանգության ծառայությունը ներկայացրել է ոչ կառուցողական պնդում, թե Ադրբեջանը ձերբակալել է անօրինական զինված խմբի անդամների՝ Իրանին մեղադրելով խմբավորման հետ կապերի համար։ Մեղադրանքն առաջադրվել է այն ժամանակ, երբ Իրանի Իսլամական Հանրապետությունը պաշտոնապես հրավիրել էր Ադրբեջանի նախագահ Իլհամ Ալիևին այցելել Թեհրան, սակայն Բաքուն դեռևս ձգձգում է ընդունել հրավերը։ Սակայն Ադրբեջանի անվտանգության ծառայությունը նյարդային է արձագանքում Հայաստանի վարչապետ Նիկոլ Փաշինյանի Իրան այցին՝ ձեռնամուխ լինելով հին ցուցակի վերահրապարակմանը և բարձրաձայնելով հնացած հարցեր»,- ասվում է հրապարակման մեջ։Լրատվամիջոցը գրում է, որ Ադրբեջանի անվտանգության ծառայությունը նաև հայտարարություն է տարածել՝ պնդելով, թե իրենք «իրանական հատուկ ջոկատների» կողմից Ադրբեջանի քաղաքացիների ռազմական պատրաստության, ֆինանսական աջակցության և արտասահման տեղափոխելու վերաբերյալ իրականացրել են ներառական հետաքննություն։«Ադրբեջանը նախաձեռնել է միջազգային հետաքննություն և հեռակա կալանավորում որոշ տարրերի և այլ անձանց, որոնք մեղադրվում էին 2018 թվականին զինված խմբավորումներ ղեկավարելու, Իրանի Իսլամական Հանրապետության հսկողության ներքո կրոնական մտքեր ներարկելու փորձի մեջ, մինչդեռ Թեհրանը կտրականապես հերքում է մեղադրանքը»,- գրում է IRNA-ն։
Էմմա Չոբանյան
