31.10.2026 | 22:55
Հայտնաբերվել է զինծառայողի դի. ՊՆ
Թուրքիան հայտարարում է, որ Շվեդիան և Ֆինլանդիան ՆԱՏՕ-ի գործարքի շրջանակում դեռ որևէ «ահաբեկչի» չեն արտահանձնել
Քաղաքականություն
03.11.2022 | 21:28
Թուրքիայի արդարադատության նախարար Բեքիր Բոզդաղը հայտարարել է, որ Ֆինլանդիան և Շվեդիան Անկարային դեռ որևէ մեկին չեն արտահանձնել, որոնք, իբր, ներգրավված են ահաբեկչական գործունեության մեջ, և որոնց արտահանձնումը պահանջում է թուրքական կողմը, գրում է ՏԱՍՍ-ը։
«Մենք այդ երկրներին ուղարկել ենք մեր պահանջները։ Արտահանձնման թեման քննարկվում է, սակայն ներկայում ահաբեկչական գործունեության մեջ ներգրավված անձանց արտահանձնման հարցում դրական տեղաշարժեր չկան»,- ասել է նա։
Բոզդաղը հայտնել է, որ արտահանձնման հարցը քննարկվելու է Շվեդիայի վարչապետ Ուլֆ Քրիստերսոնի հետ, որը նոյեմբերի 8-ին այցելելու է Թուրքիա։
Հիշեցնենք, որ հունիսին Մադրիդում կայացած ՆԱՏՕ-ի գագաթնաժողովի ժամանակ Թուրքիայի, Շվեդիայի և Ֆինլանդիայի արտգործնախարարները հուշագիր են ստորագրել՝ հաստատելով, որ Թուրքիան կաջակցի Սկանդինավյան երկրների՝ ՆԱՏՕ-ին միանալու հայտերին։ Շվեդիան ու Ֆինլանդիան իրենց հերթին պարտավորվել են Թուրքիային արտահանձնել «քուրդ ահաբեկիչներին»։
Թուրքիան ու Հունգարիան միակ երկրներն են, որոնք դեռ չեն վավերացրել ՆԱՏՕ-ին Շվեդիայի և Ֆինլանդիայի անդամակցության հայտերը։
Էմմա Չոբանյան
