12.01.2025 | 22:00
Ընտրությունները կեղծվեցին, բայց մենք էլ չպատրաստվեցինք այնպես, ինչպես անհրաժեշտ էր․ Զուրաբիշվիլի
Հյուսիսային Կորեան երեք բալիստիկ հրթիռ է արձակել
Քաղաքականություն
03.11.2022 | 14:33
Հյուսիսային Կորեան հինգշաբթի մեկ հեռահար և երկու կարճ հեռահարության բալիստիկ հրթիռ է արձակել, որոնցից մեկը Հյուսիսային Ճապոնիայի բնակիչներին ստիպել է ապաստարաններ գտնել։ Հրթիռների արձակման մասին հայտնել են հարավկորեացի զինվորականները, գրում է VOA-ն։
Հարավային Կորեայի Պաշտպանության նախարարության տվյալներով՝ տեղական ժամանակով 7:40-ին Փհենյանի մոտ գտնվող Սունան շրջանից հեռահար բալիստիկ հրթիռ է արձակվել դեպի Ճապոնական ծով: Ժամը 08:39-ին էլ Հարավային Փյոնգան նահանգից արձակվել է փոքր հեռահարության երկու բալիստիկ հրթիռ։
Հարավային Կորեայի զինվորականները «լիակատար պատրաստվածության վիճակ են պահպանում՝ սերտորեն համագործակցելով Միացյալ Նահանգների հետ և մեծացնելով հսկողությունն ու զգոնությունը», ասվում է զեկույցում։
Արձակումը տեղի է ունեցել մեկ օր անց այն բանից հետո, երբ Փհենյանը ավելի քան 20 հրթիռ է արձակել, որոնցից մեկն ընկել է Հարավային Կորեայի տարածքային ջրերի մոտ: Հրթիռն արձակվել է այն ժամանակ, երբ Սեուլը և Վաշինգտոնն անցկացնում են պատմության մեջ ամենամեծ համատեղ զորավարժությունները, որոնցում ներգրավված են երկու կողմերից հարյուրավոր ռազմական ինքնաթիռներ:
Ճապոնիայի իշխանությունները հյուսիսային շրջանների բնակիչներին տեղական ժամանակով 08:00-ի սահմաններում հորդորել են մնալ տանը կամ ապաստան փնտրել: Սկզբում Տոկիոն հայտարարել էր, որ հրթիռը թռել է Ճապոնիայի վրայով, սակայն ավելի ուշ պաշտպանության նախարար Յասուկազու Համադան հայտարարել է, որ այն «չի հատել ճապոնական արշիպելագը, այլ անհետացել է Ճապոնական ծովի վրա»։
Վաշինգտոնն ու Սեուլը բազմիցս զգուշացրել են, որ Փհենյանը շուտով կարող է իրականացնել յոթերորդ միջուկային փորձարկումը։
Տաթև Ֆռանգյան
