09.10.2026 | 14:52
Չեռնոգորիայում ձերբակալվել է ՀՀ ընտրություններին միջամտած «Рыбарь» նախագծի ղեկավար Միխայիլ Զվինչուկը
Էրդողանը մեկ տարով երկարաձգել է Ակնայում տեղակայված մոնիթորինգի կենտրոնում թուրքական զորքերի առաքելությունը
Քաղաքականություն
02.11.2022 | 13:25
Թուրքիայի նախագահ Ռեջեփ Թայիփ Էրդողանը հավանություն է տվել Արցախի գրավյալ Ակնայում տեղակայված Թուրք-ռուսական միացյալ մոնիթորինգային կենտրոնում թուրք զինվորականների մանդատը ևս մեկ տարով՝ 2022 թվականի նոյեմբերի 17-ից երկարացնելու օրինագծին, գրում է Անադոլու գործակալությունը։
Հրամանագրի տեքստը հրապարակվել է Թուրքիայի պաշտոնական տեղեկագրում՝ Resmi Gazete-ում։
Փաստաթղթում նշվում է, որ թուրք զինվորականները շարունակելու են իրականացնել Թուրքիայի պարտավորությունները, որոնք բխում են երկրների միջև ստորագրված Ռազմավարական գործընկերության և փոխօգնության համաձայնագրի դրույթներից, ինչպես նաև ապահովել հրադադարի ռեժիմը։
Նախօրեին Թուրքիայի Ազգային մեծ ժողովն ընդունել էր Թուրք-ռուսական միացյալ մոնիթորինգային կենտրոնում թուրք զինվորականների մանդատը ևս մեկ տարով երկարաձգելու մասին օրինագիծը։
Հիշեցնենք, որ 2021-ի ձմռանն Ակնայում տեղակայվել է Ռուս-թուրքական համատեղ մոնիթորինգային կենտրոն՝ հրադադարը վերահսկելու համար։ Մեկ անգամ թուրքական առաքելության գործունեության ժամկետն արդեն երկարաձգվել է։
Էմմա Չոբանյան
