Մենք կանենք այն, ինչն ամենաօգտակարն ենք համարում Հայաստանի և Ադրբեջանի միջև կայուն խաղաղության հաստատման համար․ Նեդ Փրայս

ԱՄՆ Պետքարտուղարության խոսնակ Նեդ Փրայսը ամենշաբաթյա ճեպազրույցում խոսել է հայ-ադրբեջանական հարաբերությունների կարգավորումից։

«Երեկ Սոչիում Հայաստանի ու Ադրբեջանի միջև ոչ մի շոշափելի արդյունք չի գրանցվել, բացի նախագահների ՝ հրապարակված հայտարարությունից։ Ինչ տպավորություն ունեք, արդյո՞ք կողմերը դեռևս շահագրգռված են մինչև տարեվերջ խաղաղության պայմանագիր ստորագրելու հարցում։ Արդյո՞ք տեղ մնում է Միացյալ Նահանգների միջնորդական ջանքերը շարունակելու համար», -ԱՄՆ Պետքարտուղարության ներկայացուցչին հարց է ուղղել լրագրողներից մեկը։
«Մենք, իհարկե, այդ հանդիպման մասնակիցը չենք եղել։ Մենք չէ որ պետք է խոսենք դրա մասին»,- ասել է Փրայսը։  Ըստ նրա՝ ԱՄՆ պետքարտուղար Բլինքենը բազմիցս, այդ թվում՝ Նյու Յորքում երկու արտգործնախարարների հետ հանդիպմանը, ընդգծել է , որ ԱՄՆ-ն հավատարիմ է հայ-ադրբեջանական խաղաղության օրակարգին և երկու երկրների միջև բանակցային գործընթացին։

«Մենք կարծում ենք, որ անմիջական երկխոսությունն առանցքային է խնդիրների լուծման և կայուն խաղաղության հասնելու համար, և ի դեպ, երկու երկրներն էլ հայտարարել են, որ ձգտում են այդ կայուն խաղաղությանը: Մենք կշարունակի ներգրավված լինել գործընթացում նաև առաջիկա ամիսներին՝ դյուրացնելու Հայաստանի և Ադրբեջանի միջև քննարկումները, և դա կանենք երկկողմ, գործընկերների հետ, ինչպես նաև՝ տարբեր կազմակերպությունների միջոցով»,- հավելել է Փրասը։

Հարցին, թե արդյո՞ք Բլինքենը հեռախոսազանգեր կամ հանդիպումներ կունենա ԱԳՆ ղեկավարների հետ, Փրայսը հայտարարել է, որ այդ ամենը «սեղանին է»։

«Մենք կանենք այն, ինչն ամենաօգտակարն ենք համարում Հայաստանի և Ադրբեջանի միջև կայուն խաղաղության հաստատման համար»,-ասել է Պետքարտուղարության խոսնակը։

Տաթև Ֆռանգյան