27.02.2026 | 12:00
Աննա Հակոբյանը հեռանում է կառավարական առանձնատնից // Զինվորի մահվան դեպքով ձերբակալված կա. ԼՈՒՐԵՐ
ԱՄՆ Գերագույն դատարանը մերժել է Վաշինգտոնում Էրդողանի անվտանգության աշխատակիցների կողմից ծեծկռտուքի հայցը կասեցնելու՝ Թուրքիայի դիմումը
Քաղաքականություն
01.11.2022 | 22:11
ԱՄՆ Գերագույն դատարանը մերժել է լսել Թուրքիայի միջնորդությունը՝ կասեցնելու երկու հայցերը, որոնք ներկայացվել էին ցուցարարների կողմից դրամական փոխհատուցման պահանջով Վաշինգտոնում 2017 թվականին Թուրքիայի նախագահ Ռեջեփ Թայիփ Էրդողանի այցի ժամանակ թուրքական անվտանգության ուժերի կողմից նրանց հասցված վնասվածքների պատճառով։ Այս մասին հայտնում է Reuters-ը, որին վկայակոչում է Ահվալ գործակալությունը։
Նշվում է, որ դատավորները մերժել են Թուրքիայի բողոքը ստորին դատարանների որոշումների վերաբերյալ, որոնք թույլ են տալիս դատավարությունը շարունակել՝ մերժելով երկրի այն փաստարկը, որ դաշնային օրենքը, որը հայտնի է որպես Օտարերկրյա ինքնիշխան անձեռնմխելիության ակտ, նրան անձեռնմխելիություն է շնորհում ԱՄՆ-ում նման հայցերից:
Հիշեցնենք, որ 2017 թվականի մայիսին 11 մարդ վիրավորվել, իսկ 9 հոգի հիվանդանոց էր տեղափոխվել այն բանից հետո, երբ Թուրքիայի նախագահ Ռեջեփ Թայիփ Էրդողանի անվտանգության աշխատակիցները հարձակվել էին ԱՄՆ մայրաքաղաքում Թուրքիայի նախագահի նստավայրի մոտ Քրդական Դեմոկրատական միություն կուսակցության դրոշը կրող ցուցարարների վրա։
Ծեծկռտուքը տեղի է ունեցել նույն օրը, երբ Էրդողանը Սպիտակ տանը հանդիպել է այն ժամանակ ԱՄՆ նախագահ Դոնալդ Թրամփին, որտեղ երկու առաջնորդները խոստացել էին ամրապնդել լարված հարաբերությունները՝ չնայած Թուրքիայի նախագահի նախազգուշացմանը Թրամփին տարածաշրջանում քուրդ զինյալներին զինելու մասին։
2018 թվականին երկու հայց էր ներկայացվել դեպքի առնչությամբ, որոնք պահանջում են Անկարային պատասխանատվության կանչել և դրամական փոխհատուցում վճարել վնասվածքների համար։ Լրատվամիջոցի տվյալներով՝ հայցվորները տասնյակ միլիոնավոր դոլարներ են պահանջում։
Թուրքիան հայցը բողոքարկել է ԱՄՆ Կոլումբիայի շրջանային դատարանում՝ վկայակոչելով Օտարերկրյա ինքնիշխան անձեռնմխելիության մասին օրենքը, Դաշնային խախտման պահանջների մասին օրենքը և Արդարադատության դեմ ահաբեկչության հովանավորների օրենքը, որը սահմանափակում է ամերիկյան դատարանների իրավասությունն օտարերկրյա կառավարությունների դեմ հայցերի նկատմամբ: Դատարանը Թուրքիայի դեմ վճիռ է կայացրել 2021 թվականին։
Թուրքիան ծեծկռտուքի մեջ մեղադրում է քուրդ զինյալների հետ կապ ունեցող ցուցարարներին, սակայն Վաշինգտոնի ոստիկանապետը կատարվածը որակել է որպես դաժան հարձակում խաղաղ ցուցարարների վրա։ Վաշինգտոնում մեղադրանք է առաջադրվել մի քանի թուրք անվտանգության գործակալների և ծեծկռտուքի մեջ ներգրավված այլ անձանց նկատմամբ: Երկու մեղադրյալներ, որոնք Էրդողանի անվտանգության թիմի անդամ չեն, իրենց մեղավոր են ճանաչել։
Էմմա Չոբանյան
