Իրանը 1000 միավոր զենք կմատակարարի Ռուսաստանին. CNN

Իրանը պատրաստվում է Ռուսաստան ուղարկել մոտ 1000 միավոր հավելյալ սպառազինություն՝ ներառյալ փոքր հեռահարության «երկիր-երկիր» բալիստիկ հրթիռներ և ավելի շատ հարձակողական անօդաչու թռչող սարքեր: Այս մասին հայտնում է CNN-ը՝ հղում անելով արևմտյան երկրների պաշտոնյաներին, որոնք ուշադիր հետևում են Իրանի սպառազինությունների ծրագրին։

Սա կլինի առաջին դեպքը, երբ Իրանը Ռուսաստանին է մատակարարում առաջադեմ ճշգրտությամբ կառավարվող հրթիռներ, որոնք կարող են Կրեմլին զգալի իմպուլս տալ մարտի դաշտում, հայտնում են ամերիկյան լրատվամիջոցները:

Իրանից Ռուսաստան զենքի վերջին առաքումը ներառում էր մոտ 450 անօդաչու թռչող սարք, որոնք ռուսներն արդեն օգտագործել են Ուկրաինայի դեմ հարվածների ժամանակ։

Թեև այս սպառազինության առաքման հստակ ժամկետ չկա, պաշտոնյաները կարծում են, որ դրանք կմատակարարվեն մինչև տարեվերջ:

Սեպտեմբերին Ուկրաինան պաշտոնապես մեղադրեց Իրանին Ռուսաստանին զենք մատակարարելու մեջ և հետ վերցրեց Իրանի դեսպանի հավատարմագրումը։ Հոկտեմբերի 18-ին արտգործնախարար Դմիտրի Կուլեբան առաջարկեց Վլադիմիր Զելենսկիին խզել դիվանագիտական հարաբերությունները Իրանի հետ։

Ուկրաինայի Զինված ուժերի ռազմաօդային ուժերի խոսնակ Յուրի Իգնատն այսօր հայտարարել է, որ Ռուսաստանը նախատեսում է իրանական հրթիռներ տեղակայել Ուկրաինայի հյուսիսային սահմանին։ Նրա խոսքով՝ Ուկրաինայի համար դժվար կլինի պաշտպանվել դրանցից այն միջոցներով, որոնք ունի իր սպառազինությունում։

Տաթև Ֆռանգյան