Գերմանիայի ԱԳՆ ղեկավարը Տաշքենդում կոչ է արել կանխել Ռուսաստանի ազդեցության աճը

Գերմանիայի արտաքին գործերի նախարար Աննալենա Բերբոքը Կենտրոնական Ասիա կատարած եռօրյա շրջագայության ժամանակ կոչ է արել ընդլայնել գործընկերությունը: Ուզբեկստան, իսկ ավելի վաղ՝ Ղազախստան իր այցով նա ցանկանում է համագործակցության ազդանշան ուղարկել նախկին խորհրդային հանրապետություններին, նոյեմբերի 1-ին Տաշքենդում Ուզբեկստանի արտգործնախարար Վլադիմիր Նորովի հետ բանակցություններից հետո հայտարարել է Բերբոքը:

Լրագրողների հետ զրույցում նա հորդորել է կանխել Ռուսաստանի և Չինաստանի ազդեցության անարգել աճը Կենտրոնական Ասիայում։ Մամուլի ասուլիսում Բերբոքը բարձրացրել է Չինաստանի հետ Գերմանիայի հարաբերությունների թեման։ Գերմանիայի կանցլեր Օլաֆ Շոլցի՝ Պեկին կատարած առաջին այցից անմիջապես առաջ նա հիշեցրել է արդար մրցակցության, մարդու իրավունքների և միջազգային իրավունքի ճանաչման հարցերում Բեռլինի դիրքորոշումը հստակեցնելու անհրաժեշտության մասին, հայտնում է DW-ի ռուսական ծառայությունը։

Գերմանիայի ԱԳՆ ղեկավարը հայտարարել է նաև Չինաստանի նկատմամբ գերմանական քաղաքականության փոփոխությունների անհրաժեշտության մասին։

«Մենք՝ Գերմանիայի դաշնային կառավարությունը, պետք է նոր ռազմավարություն մշակենք Չինաստանի համար, քանի որ վերջին տարիներին չինական քաղաքական համակարգը արմատապես փոխվել է»,- ասել է Գերմանիայի արտգործնախարարը։

Սպասվում է, որ Օլաֆ Շոլցը նոյեմբերի 3-ին կմեկնի Չինաստան։ Սա դաշնային կանցլերի պաշտոնը ստանձնելուց հետո նրա առաջին այցը կլինի Չինաստան։

Տաթև Ֆռանգյան